Kaniadtong nagsugod pa mi sa akong mga anak sa pagbiseklita, daghan na ang mga motorsiklo sa atoang kadalanan. Ako nang gitagna nga sa umaabot nga katuigan managhan pa og samot ang mga motorsiklo ug scooters.
Wa ko masayop kay hapit tanang balay karon dunay labing minos usa ka motorsiklo ug scooters ang naa sa matag balay. Maihap ra tingali ang wala. Bisan ordinaryong tawo naa ani tungod kay gawas nga affordable, magamit na man kini sa panginabuhian.
Tungod sa kadako na sa motorcycling community, sama na og mahadlok ang elected officials nga mobangga sa sector. Ako ning nabantayan tungod kay daghan sa mga tigmotor sayon ra kaayong mo-counterflow.
Ang traffic enforcers motan-aw lang aning mga tawhana. Apan maayong masayran nga gikonsiderar nga serious offense ang counterflowing base sa Land Transportation and Traffic Code kun Republic Act No. 4136.
Ang unang kalapasan magpahamtang og multa nga P2,000 ug pagkasuspenso og tulo ka buwan sa lisensya. Sa ikaduhang kalapasan P2,000 ang multa ug pagkasuspenso og unom ka buwan sa lisensya. Sa ikatulong kalapasan, P2,000 ang multa ug pagka-revoke sa lisensya.
Grabe ang silot noh, apan ang mga local government unit (LGU) nagdumili sa pagpatuman ani nga balaod sa trapiko kay nahadlok sa backlash sa mga rider. Ang illegal ug kuyaw nga buhat sa dalan nahimo nang naandan.
Nagtuo na ang kadaghanan sa motorcycle riders nga sakto ang ilang gibuhat bisan sayop.
NAKAAPEKTO, KUYAW
Ka usa nga naghatod ko sa akong asawa sa iyang trabahoan sa GMA-7 sa Nivel Hills, Apas, nangutana ko sa usa ka traffic enforcer nganong di nila dakpon ang nag counterflow. Tubag sa enforcer nga nagdali ang mao nga mga tawo.
Nikatawa ko kay kami sa akong misis nga nagdali, wa man mi ni-counterflow, either nisunod mi sa flow sa traffic or nanubay mi daplin sa kalsada. Kay alang namo kuyaw kaayo ang counterflowing. Nagpaisa ka sa kahigayunan nga mabanggaan ka sa kasugat nga sakyanan.
Kon duna kay accident insurance seguradong di ka mabayran kay nakalapas ka man sa balaud trapiko.
Gawas nga nagbutang ka sa imong kaugalingon sa kakuyaw, nakaapekto ka pa sa dagan sa trapiko. Nagdali ka tuod, apan ang imong gikasugat nga mga drayber sa mga sakyanan mopahinay sa pagpadagan sa kabalaka nga ikaw maigo.
Makapahinay diay sa dagan sa trapiko ang ni-counterflow. Mao usab ni ang hinungdan sa mga aksidente sa kadalanan nga dunay nangamatay. Ang nakapait kay ang nakabangga nga mga drayber nga way sala maoy mapriso, makabayad bisan way kasal-anan nga nahimo.
MOSAMOT PA
Duha lang ka mga lider ang akong nakit-an nga nipatuman sa pagpakgang sa counterflowing, sila si kanhi Mandaue City Mayor Luigi Quisumbing ug kanhi Mayor ug karon Vice Mayor-elect Tomas OsmeƱa. Hangtod karon buhi pa ang iyang executive order, apan human sa iyang katungdanan wa na kini gipatuman sa Dakbayan sa Sugbo.
Karon nga nabalik na si Tom sa pwesto, iya pa kaha kini nga ipatuman? Grabe ra sab kaayo to og silot kay usa ka buwan nga tanggungon ang mga motorsiklo sa unang kalapasan sa drayber. Alang nako pagpangduot na sab to sa panginabuhi sa ordinaryong mga tawo.
Okay ra nang lima ngadto sa 10 ka adlaw nga tanggungon ang motorsiklo. Unya ang mga ngalan sa mga drayber nga nakalapas isumiter ngadto sa Land Transportation Office (LTO) aron sab manubag sa kalapasan.
Gikinahanglan gyud nga ipatuman ang balaod batok sa counterflowing aron madisiplina ang mga drayber ug mas luwas ang atoang kadalanan gikan sa mga aksidente.
Mahimo man nga ipatuman ang balaod, apan di dihadiha. Mga unom ka buwan ang higpit nga kampanya sa pagbadlong sa mga mo-counterflow. Paglabay sa unom ka buwan, ipatuman nang dunay multa.
Di lang ang LGU ang mopatuman niini, apil na ang LTO. Pinaagi niini, mas magmatngon na ang mga drayber sa motorsiklo. Kay kon di ni buhaton, managhan pa og samot ang mga aksidente, daghang mga kinabuhi ang makalas, daghang mga pamilya ang apektado sa kabuang sa usa ka drayber.