Vallena: CBRT: Di sulbad sa trapiko?

Roger E. Vallena
Roger E. VallenaFile photo

Sa paghimo og dagkong mga imprastraktura sa karsada, ang unang tumong niini mao ang pagpaluag sa dagan sa trapiko. Mas paspas ang biyahe, mas maayo ang produksyon. Wa gitukod ang mga proyekto di lang sa sektor sa mga kabos, kon di alang sa tanan.

Ang Cebu Bus Rapid Transit (CBRT) wa gitumong aron dunay maayong kasakyan ang yano ra nga mga tawo. Kon di, pagbaton og mas maayo nga mas transportation aron bisan ang mga adunahan nga dunay mga sakyanan makombinser nga mas sayon ang pagbiyahe kay sa magdala og awto.

Sa ato pa, gipaabot nga magpaminos kini sa mga sakyanan sa kadalanan kay sa hatagan ang mga kabos o yanong mga lungso­ranon og efficient nga kasakyan padung sa trabaho ug pag-uli.

Mao ni ang unod sa mga pagtuki nga akong gitambungan sugod niadtong 2012, dihang ning-lobby ming mga bike organization nga tugtan ming makadala og mga biseklita.

Nisanong ang mga proponent ug consultant basta folding bike ang gamiton sa pasahero. Gihimo kini namo kay ang Tiklop Society of the Philippines (TSP) nakakombinser sa Light Rail Transit mgmt. nga tugtan sila nga makadala og biseklita sakay sa LRT. Nilampos sila busa nadasig o na-inspire sab mi sa pagduso sa samang lakang.

SA TANAN

Kon ingnon nga ang CBRT alang sa yano nga mga lungsoranon, di alang sa mga adunahan, di pagsulbad sa nagkagrabeng trapiko, naghimo kini sa proyekto nga useless ug kataw-anan.

Kay kinsa man ang unang maapektuhan niini? Ang mga drayber sa pampublikong mga sakyanan, apil na ang mga modern public utility vehicle operators nga gilangkuban sa mga kooperatiba. Nagsangkiig na gani sila karon sa pagbayad bunga sa minos nga kita sa pagpamasahero nga resulta sa kahuot sa trapiko, samot na unya kon hingpit nang mahuman ang proyekto.

Bisan unsaon pag kwenta, motibhang ni og dako sa gilapdon sa mga karsada nga agian nga naghuot nang daan sa kadaghan sa mga sakyanan.

Apan maanindot ba ang CBRT? Maayo, apan di maayo nga kutob ra dinhi ang proyekto. Anugon usab kon undangon kay kausik sa P900 milyunes nga nagasto.

DI PAGPALUAG?

Sa Curitiba, Brazil, diin nagsugod ang rebolusyon sa BRT niadtong 1970s, gitumong kini sa pagpaluag sa trapiko, labina kay hagip-ot ang iyang mga karsada. Nilampos kini apan sa paglabay sa katuigan, nanaghan ra gihapon ang mga sakyanan sa kadalanan.

Kon basahon ang mga artikulo nga available sa internet, kini nahitabo kay nagkabati ang mga imprastraktura sa mga pasilidad sa pagpanglabay sa katuigan.

Gitumbok usab kini nga palpak sa ubang mga dapit sa kalibutan. Kon palpak man kini, nganong giduso man kini og maayo dinhi sa Cebu?

Mas maayong tun-an kon diin sila nangasayop. Unsay kalainan sa BRT sa mao nga mga nasod ngadto sa Curitiba?

Dinhi, makakuha og leksyon ang kagamhanan kon unsay buhaton aron epektibo ang BRT dinhi sa Sugbo itandi sa kasinatian sa Thailand, Viet­nam ug India.

Di na lang ta mobalik sa uno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph