Sulod sa upat ka tuig, ang akong ikaduhang pinuy-anan naa sa Pier 1. Di lang ko maghisgot kon unsa. Apan motuo ka o di, gikan sa Plaza Independencia padulong sa Cebu Normal University (kanhi Cebu State College) maglakaw ra ko. O kon di man gani, gikan sa plaza padulong sa Maria Christina St. sa uptown area diin mi magtambay sa akong mga amigo.
Maglakaw ra ko kay nindot lakwan tungod kay ang sidewalk sa Osmeña Blvd. lapad, luwas gikan sa mga sakyanan.
Dinhi sab ko nakaobserbar nga ang lapad nga sidewalk magdasig sa mga tawo sa paglakaw bisan medyo layo pa ang lakwon niini. Apan kinsa man say ganahan molakaw kon makigpatintero ka sa tanang mga sakyanan, gikan sa biseklita ngadto sa mga bus? Mahadlok ka busa bisan duol ra, mosakay ka kay mas luwas.
Ingon ani sab ang biseklita, kon way tarong nga bike lanes, di ka makapaabot nga modagsa ang mga manikaray. Yes, nahitabo ni panahon sa Covid-19 tungod kay kuyaw ang pagsakay og public vehicles kay hayan matakdan ka kon dunay nasakit.
Ikaduha, mag exercise tungod kay gikinahanglan ang lig-on nga immune system. Mao nga daghan ang nangaengganyo sa pagbiseklita. Sa Europe gani, ang order nilanat pa og upat ka bulan una pa ma deliver ang gi-order nga biseklita.
Ikatulo, minos pa ang mga sakyanan sa kadalanan busa, ganahan ang tawo nga mosikad. Minos ang sakyanan, mas luwas ang kadalanan.
OPORTUNIDAD
Sa ato pa, ang bike culture masustenir pa unta kon padayon nga miminos ang mga sakyanan sa kadalanan. Apan bisan gani sa kabukiran, daghan nang mga sakyanan sa karsada nga nakapakuyaw sa pagtindak. Di ikalimod nga ang mga karsada sa kabukiran kadaghanan tag two lanes lang. Busa hagip-ot.
Mao tingali nga mas daghan na sa mga mountain biker nga ganahan mag trail.
Niini, kon duna pa untay dedicated o protected nga bike lane, mas managhan pa unta ang magbiseklita human sa pandemic. Apan nibalik man sa naandan ug nigrabe pa ang kahimtang sa trapiko, daghan ang nangundang sa pagsikad, bisan gani sa weekend.
Hatagi og igong agianan kaming mga nagbiseklita, kanang di lang badlisbadlis, di ba managhan ang mag bike, mominos pa ang sakyanan sa kadalanan.