Sa akong pagpalit sa una nakong mountain bike, ako rang plano ang paggamit niini pagduaw sa lubong sa akong anak nga si Mary Heart. Lisod alang nako ang pagsakay og PUJ kada buntag kay daghan ang mga pasahero sa Pit-os pa lang.
Gawas sa kalisod, kinahanglan pa nakong manghimasa aron di manimaho samtang nagsakay og PUJ. Lahi kon magbiseklita lang kay bisan nagkagidlay way magbantay kay wa man ko nakauban sa tapok sa mga tawo.
Sa sugod pa lang to. Unya giimbitar ko og sikad sa akong mga kauban sa SunStar nga hilig sab og sikad. Hangtod nga gawas sa pagduaw sa lubong sa akong anak, ganahan na ko magsuroysuroy nga magsikad. Sa laktod, nagkalayo ang akong naandan nga mga rota. Dako sab to og natabang sa akong bugno sa depression sa pagkamatay sa akong anak.
Kanang lingawlingaw sa pagsikad sa duol di diay na paigo, kay magkadugay, magkalayo ang pagsikad. Mangita na man ko og mas layo nga rota kay sa akong naandan nga duol ra sa amoa. Mao ni ang akong naamguhan.
Sa wa pa gani ko magsugod og adto sa sementeryo, naglibotlibot ra ko sa Villa Leyson subdivision aron pagtuon sa pagpangambyada. Kay ang akong unang napalit 21-speed. Kanang tulo ka rings sa atubangan ug pito ka rings ang sprocket.
Kon mopalit ka og biseklita kay panglingawlingaw lang sa duol, huwata nga mangita ka na og mas layo nga rota. Makaamgo ka na lang nga toa ka na sa tumoy sa bukid. Unya magkadugay, mangita ka pa og laing bukid.
NAGDALI MAKABISEKLITA
Ganahan kaayo tang makaangkon dayon og biseklita. Ang atong buhaton mopalit dayon og brand new nga built bike. Alang nako sayop ang pagpalit og brand new. Ang second hand built bike mas maayo nga alternatibo.
Base sa akong experience, mas mahal ang brand new built bike kay sa second hand. Tinuod sinew ang mga parts, apan ubos sagad ang specs itandi sa second hand nga upgraded kaayo. Used lagi, apan kay biseklita man, kadaghanan sa mga dapat lig-on pa kaayo.
Tinuod dunay mga Shimano series na ang parts sa brand new, apan mahal ra gihapon kaayo ang presyo itandi sa second hand nga built bike nga upgraded na ang mga dapat. Mas maayo kon makatayming ka og slightly used sama sa akong mga napalit kaniadto. Hangtod gud karon buhi pa ang mga dapat nga akong napalit.
Mao na ang akong experience kaniadto hinungdan nga nakapabarog ko og lima ka mga mountain bike. Labina gyud dihang nakaamigo ko sa bike technician sa Aison Bikeshop diin ko magtambayan. Ang mga adunahan nga bike enthusiast magsige lang og ilis og parts bisan slightly used pa.
Kon ganahan ka og shortest route unya limited ang budget, pangita og second hand built bike. Siguraduha lang nga di ni kinawat.
DAKO OG MATABANG
Sa kahimtang sa panahon karon nga nagkakuyaw tungod sa climate change, ang biseklita usa gyud sa klase sa transportasyon nga gikinahanglan sa matag pamilya. Wa ni nagsalig og fuel o kuryente kay human-powered man ni.
Sa kadaghan nang grabeng mga bagyo nga nangagi, diin nihit ang kuryente ug gasolina, ang biseklita magamit kaayo. Sa bagyong Ruping niadtong 1990 biseklita ang akong transportasyon kay daghan sa mga kalsada di maagian tungod sa mga debris.
Niadtong Bagyong Odette, usa sa nadali namo og gamit ang biseklita. Samot na sa panahon sa pandemic, ang biseklita gamit kaayo kay di tanang gas stations accessible.
Ang among anak nga si Marylove mangompra nga nagsakay sa among mountain bike. Mahimo kaayo nga ang biseklita nimo i-set up nga pang-commuter, diin mahimo kang magbutang og mga karga nga makaya sa imong mga tuhod pagsikad.
Di man tuod daghan kaayo ang makarga, apan kaya kaayo ang essentials lang ang ipamutang. Kon duna may tulo ka mga biseklita, maapod ang mga karga, mas daghan, mas gaan ang madala.
Sa mga kalisdanan, ang biseklita masandigan lagi kaayo.