Sa dihang nagsugod ko og sikad mga kapin sa 15 ka tuig na ang nakalabay, grabe ang kadaghan sa mga manikad sayo sa buntag. Regular days na kun mga adlaw tingtrabaho.
Apan karon, maihap na lang sa tudlo ang akong makit-an sa karsada, bisan padulong sa Brgy. Busay. Kaniadto bisan sa gabii, magpanon ang manaka sa Brgy. Busay kay mag-night ride. Kapila nako nakakita og grupo sa fat bike, mountain bike ug duna pay folding bikes nga manganaog mga alas 8-9 sa gabii gikan sa ibabaw.
Kaanindot unta kon magkadako ang komunidad sa nagbiseklita, apan maingon ra nato nga uso-uso ra. Dunay mawagtang nga mga grupo, pulihan usab kini sa lain. Hinuon, dunay mga tawo nga grabe ang gugma sa biseklita nga way paglubad, ila kining gahinan og panahon.
Sama sa akong mga higala sa Talamban nga sila si Ramon Villamor ug Giovanni Tudtud. Kining grupo nga nahimo kong part kaniadto way paglubad ang gugma sa biseklita. Maghilak ang mga holiday ug Dominggo nga di ni sila manikad.
Maayo ra ba og duol ra, usahay patagon ang kabukiran hangtod sa San Fernando.
NASAKIT
Sukad ko nag-eczema sa 2020, nag-limit na ko sa pagbulad sa init, kanang direct exposure sa adlaw.
Okay lang sa motorsiklo tungod kay putos man ko sa baga nga helmet ug jacket ingon man karsones. Dili ra masunog o ma sunburn ang akong panit. Nitagam na ko ka usa nga nasaag ko sa Consolacion, naabtan ko og alas 9 pasado sa buntag sa karsada.