Vallena: Ilha ang imong biseklita

Pedal
SunStar Vallena
SunStar Vallena

Daghan sa bag-o nga magbiseklita ang nag-underestimate sa pagsikad kay gatuo nga sayon ra kaayo ug kaya ra ni. Mao sab ni ang akong pagtuo kay kaniadto gud, ang siyudad akoa ra man sikaron gikan sa Talamban ug balik nga way pahuway.

Apan di man diay sayon, labina kon di ka kahibawo sa pacing nga sagad maoy sayop sa mga newbie. Akong nabantayan mao ang kapaspas sa pagsikad sa mga bag-o pa mao nang maluya lang dayon. Magpusnga na katunga pa lang gani sa biyahe, labina kon magtungas na.

Sa una nakong sakay og moun­tain bike nga akong na­palit niadtong Disyembre 2009, kaingon nako nga makalahos ko nga way hunonghunong padulong sa amoa sa Bacayan, apan kutob ra ko sa atbang sa Gaisano Country Mall tungod kay kutas na. Nipahuway ko aron makaginhawa og tarong. Ang hinungdan mao ang wa magkadimao nako nga pagpangambyada. Mobug-­at lang og kalit ang biseklita tungod kay di mao ang akong kambyada. Inay pagaanan, naa nako gisulod sa kinakusgan niya nga bahin mao nga nibug-at.

Nagsige ko og tuon sa akong biseklita nga way tan-aw tan-aw og Youtube tutorials kay gusto kong makat-on based on experience.

IMPORTANTE

Nganong importante man nga masuheto ka sa imong biseklita? Tungod kay mas dali kang makabantay kon dunay daut ug dako kaayo nimo ni og tabang sa imong mga ride. Mahibawo ka kon kanus-a ka mokambyada, asa dapita gaan apan di makompromiso ang imong speed.

Mao ni ang akong himuon kada duna koy bag-ong biseklita o nagtaud og bag-o nga drive train. Kada part sa bike, duna ni managlahi nga performance. Dinhi sab nimo mahibaw-an kon okay ra ba ang imong napalit nga moving parts sa biseklita, labina kon mag-upgrade ka.

Lain nga importante kaayo mao ang size sa imong frame. Kon ikaw ginikanan nga magpalit og mountain bike sa imong anak, mas maayo nga imong dad-on ang imong palitan aron mabana-bana sa bike mechanic sa mga shop kon okay ra ba ang frame size. Yes, naay sizes ang kada frame nga sagad ipahaum sa height sa rider. Di magpataka og palit kay sa rides, dako sab ni og epekto.

Kon mopalit gani og biseklita, ayaw pagpataka. Unya kon naa na, sakyi og sige aron imong maila-ila og maayo ang imong biseklita.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph