Sa di madugay, mag-anam na unya kadaghan ang mga pampublikong transportasyon nga maggamit og electric. Sa Metro Manila, duna nay mga taxi nga nagdagan nga electric ang makina. Wa na kinahanglana ang fossil fuel, sama sa gasolina ug krudo.
Gitumong kini aron anam-anam nga makuhaan ang carbon footprint sa nasod, labina sa urban centers, sama sa Metro Cebu. Ang wa mahibaw-i, sa mga pagtuon sa abroad, ang aso gikan sa mga sakyanan nga nagdagan pinaagi sa fossil fuel maoy hinungdan sa mga kaso sa cancer.
Di lang kay kini ra, ang aso nga di makita gikan sa mga sakyanan mao usay gibasol sa respiratory nga mga sakit, sama sa ubo, hubak ug uban pa. Ang uban niini makamatay kon di matabang dayon kon moatake kay makaapekto man kini sa pagginhawa.
Grabe ang air pollution sa mga dapit nga daghan og mga sakyanan nga mag-agian. Mao kini ang nakaplagan sa mga check-up sa air quality atol sa among mga kalihukan sa road revolution kaniadto.
Sa Osmeña Boulevard, usa sa among mga dalan nga gipasirhan og pipila ka mga oras, grabe ang pagsaka sa air quality sa tunga lang sa adlaw nga paghunong sa pagpaagi sa mga sakyanan. Apan makapaguol kay daghan ang nangasuko namo kay nagdala lang mi og trapiko kay naghuot ang mga sakyanan sa sikbit nga mga dalan samtang nag-enjoy ang mga nagbiseklita ug nag-roller skate.
PROBLEMA
Sa tinud-anay lang, ang usa sa mga hinungdan sa atong problema sa trapiko mao ang atong car-centric nga pagplano sa urban centers ug misangko sa mentalidad nga car-centric usab. Ang resulta? Dakong problema sa trapiko.
So, ang problema nagsugod diha sa pagplano sa atong kadagkuan sa Department of Public Works and Highways (DPWH) ug uban pang mga ahensya sa kagamhanan, apil na sa mga local government unit. Tan-awa lang gud, palapdan sa kagamhanan ang mga dalan, apan nakakita ka ba og dedicated nga sidewalk nga malakwan sa pedestrians? Wala. Naa man gani, gamay ra kaayo.
Ang mentalidad sa public officials nga gitugyanan sa mga imprastraktura mao ang nagkondisyon sa hunahuna sa publiko sa car-centric nga konsepto ug ideya.
So, ang problema nagsugod sa polisiya sa kagamhanan nga gisagop sa publiko nga sakto. Apan nakamugna kini og dakong problema: trapiko.
MABASOL
Kinsay may basulon sa atong kalbaryo sa kalsada? Kita ra sab. Di nato hingpit nga mabasol ang LGU sa kagubot sa kahimtang sa trapiko, sama sa Governor M. Cuenco Ave. (mas nailhan nga Bantal road).
Ang kahuot sa trapiko di lang tungod sa palpak nga traffic management, kundi, polisiya sa kagamhanan nga car-centric. Palapdan ang mga dalan aron mas daghang mga sakyanan ang makaagi. Nagdasig kini sa katawhan sa pagpamalit og sakyanan o pagsalig sa motorized nga public transport. Huot na sab ang mga dalan.
Ang among gihimong road revolution kaniadto mao ang pagdasig sa publiko sa pagsagop sa human-powered transportation. Ang among pag-lobby sa protected bike lanes alang gihapon sa kinabag-an.
Tan-awa, 10 ka tuig human sa among gipahigayon nga road revolution, ang kahimtang sa trapiko nagkagrabe nunot sa pagsaka sa pupulasyon, pag-umento sa buying power sa katawhan ug pagpanag-iya og motorized nga mga sakyanan, sama sa motorsiklo, kay nagkabarato.
Yet, ang wa na-appreciate sa katawhan mao ang biseklita nga simple kaayo nga solusyon sa trapiko. Paradigm shift ang atong gikinahanglan aron pagsulbad sa nagkagrabeng problema sa kalsada.