Vallena: Kuyaw ang counterflow

Roger E. Vallena
Roger E. VallenaFile photo

Isyo karon ang counterflowing tungod sa nag viral nga video sa usa ka sakyanan nga nisugat sa mga nagmotorsiklo nga ning-counterflow sa usa ka karsada sa dakbayan sa Mandaue.

Sa hapit na dul-an 10 ka tuig nakong nagmotorsiklo, maihap lang ang mga higayon nga nakahimo ko ani sa pagsugat sa mga sakyanan. Sa akong nahinumdoman wa gani kaabot og lima ka mga higayon, sa solid yellow line.

Di pa gyud na lahoslahos kay kana rang naa ko atubangan sa usa ka dako nga trak nga kuyaw maigo ko. Precaution ang akong gibuhat.

Bisan niadtong nagsige pa ko og bike to work, mapidpid ra ko sa daplin sa karsada hinungdan nga mas pabor ko sa folding bike kay sayon ra ilusotlusot tungod sa iyang geometry nga mas mubo, mas gamay.

Gawas nga kalapasan sa balaod sa trapiko ang counterflowing, nagbutang ka sab sa kakuyaw sa imong kaugalingon ug ubang mga motorista. Kon madisgrasya ka, maayo rag ikaw ang malukapa ug maangol. Kon nabanggaan ka sa imong gisugat nga sakyanan nga way sala ang driver kay imo man nga kabuang ang pagsugat, mapriso pa ug madaut pa ang sakyanan.

SUICIDE

Sa akong 30 ka tuig kapin nga trabaho sa media, sagad sa mga aksidente nga dunay nangamatay nagagumikan sa brake nga nag-malfunction. Apan karon nga daghan na ang mga motorsiklo sa kadalanan, ang counterflowing maoy numero uno nga hinungdan. Bisan ang Traffic Enforcement Agency of Mandaue (Team) niingon nga mayoriya sa mga aksidente sa siyudad tungod sa counterflowing sa mga nagmotorsiklo.

Bisan sa kadaghan sa mga aksidente, daghan gihapon ang maghimo niini. Mosugat pa sa mga sakyanan, masuko kon mababagan o di palutson.

Dihay ka usa, nanakop ang Cebu City Transportation Office (CCTO) traffic enforcers sa mga nang-counterflow, ang mga nakalapas mao pay nangasuko. Nagpatuman sila sa balaod ra baya. Apan, inconsistent man sab gud ba. Mas maayo alang sa CCTO nga ipahibawo nila, mokampanya sila sugod una sa pagpamadlong sa mang counterflow sulod sa usa ka buwan.

Di lang ang CCTO, apil na ang Team ug City of Talisay Traffic Operations and Development Authority (CT-TODA). Edukahon ug pasabton ang mga nagmotorsiklo.

MENTALIDAD

Kini ang paagi sa pag-usab sa mentalidad sa mga driver nga dugay na kaayong gipasagdan sa mga traffic authority, gi-tolerate bisan kon kini kuyaw.

Makasugat og resistance ang mga enforcer. Apan madugayan makasabot ug motuman ra ang mga nagmotorsiklo. Ingon ana man gyud nang pagpatuman sa balaod, dunay resistance sa sinugdanan.

Hinayhinay, kanunay nga pagpatuman sa kausaban hangtod nga mausab ang kahimtang sa panghuna-huna sa mga motorista.

Ang usa gud sa hinungdan kon nganong dunay resistance, nagtuo ang daghan nga nagmotorsiklo nga sakto ug okay ra ang ilang gibuhat. Sa tinuod lang, sama ra na og suicide ug pamahala ang counterflowing.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph