Usa sa dakong problema kon mag-bike ka mao ang paghiyos sa ligid kon matunok o magisi kay naigo og hait nga butang. Usa ni sa komun kaayo nga problema sa bikers, labina gyud niadtong lagyo og biyahe.
Kalagmitan basta naa ka sa kalsada, dunay mga higayon nga makaligis og lansang ug uban pa. Naa gani higayon nga staple wire ang nitusok sa akong ligid.
Ang pangutana, unsa may mas maayo, tubeless nga ligid o dunay inner tube? Sa motorsiklo, nakasuway na ko sa duha. Mas advantage ang tubeless kay makadagan pa man kon mogana lang ang sealant. Makaadto ka pa og vulcanizing shop.
Sa naay tube, kon matunok, wa na gyud, hiyos na if punctured ang interior. Magguyod ka na padulong sa vulcanizing shop. Klaruhon lang nako, sa motorsiklo ni, di biseklita.
Sa biseklita, di man ko maproblema kon matunok kaniadto kay duna man koy patch kay wa ko nisuway sa tubeless tungod sa experience sa akong higala nga napugos sa pagsakay og habalhabal kay di na man matapakan ug wa na nigana ang sealant sa iyang ligid nga natunok tungod sa kadako sa buslot.
Mao to nitambag siya nako nga di mag tubeless kay mag trouble gyud ang imong adlaw sama niya. Maayo lang if minor ang nakaigo o buslot sa ligid, makaya ra na sa sealant base sa akong problema nga nasinati sa motorsiklo.
TAMBAG SA MEKANIKO
Nangutana sab ko sa usa ka higala nga bike mechanic unsay maayo, tubeless o dunay tube. Matod niya nga depende. Ang sealant makadaut sa ligid, matod niya. Kana kon weekend rider ka lang. Kanang mosikad sa Sabado ug Dominggo o ka usa lang sa usa ka semana kay ang sealant makadaut sa ligid.
If frequent ka nga tigsikad sama nako kaniadto, advisable ang tubeless kay mao lagi, mogana ang sealant ug magsige og tuyok libot sa sulod sa ligid. Niini, di madaut ang mga ligid kay wa natambay og dugay.
Apan alang nako, ang dunay inner tube maoy maayo if tigbiyahe ka og lagyo kay if matunok, mahimo rang tapakan sa patch. Nakapalit mi sa una sa ROX og bike patch nga lig-on kaayo, ipapilit ra pero mga duha ngadto sa tulo ka buwan ang paglungtad. Tangtangon ra ang tube, limpyuhan ang part nga nabuslot, unya ipapilit.
Sa sinugdanan wa koy salig sa bike patch, but nahibulong ko nga nauli na lang ko gikan sa long ride, wa man nihiyos ang ligid. Pipila ka mga semana ang nakalabay, nipalit ko og bag-ong tube, wa nagisi ang patch dihang akong gitan-aw. It looked new pa gani.
Kon mag tube ka, mas maayo naa kay bike patch ug mga gamit sa pagtangtang sa ligid kon mosikad ka. Seguro ko, di ka mopauli nga magguroy sa imong biseklita o kaha magpas-an samtang magsakay og habalhabal.
Ang akong higala akong gihatagan sa patch. Heavy user to kay di moagi og kalsada, tig single track. Two months pa una nabuslot ang patch. Lig-on gyud, di ba?
PANGANDAM
Kon mag ride gani, kinahanglan andam ka sa mga problema nga imong masugatan. Sagad sa problema mao ang flat sa ligid. Ikaduha pagkaputol sa kadena. Sukad wa pa ko naputlan og kadena, apan kadaghan na ko nahiyusan og ligid.
Wa ko nakasuway nga naputlan ko kay di man ko tigpalit og baratuhon nga kadena. Nagkadugay ko sa pagsikad, nagkamahal ang akong palit. Diha nay niabot og P2K ang presyo. Nagsugod lang ko sa tag P600 niadtong late 2009 ug nagkadugay, ni-upgrade ko og model sa kadena.
Basta moving parts gani, labina sa kadena ug brakes, bantayan gyud nimo ni. Ayaw pagdaginot sa budget if mao ni ang imong itaud tungod kay the higher the price, the better ang performance. Di lang ko mo-recommend og brand but ang bikeshops nakahibawo niini.
Kon duna kay higala nga bike mechanic, mas maayong mokonsulta labina kon bag-o ka pang nagsikad. Mas maayong sa bike mechanic kay neutral ang pagtan-aw, di biased.