Bisan unsaon nako og hunahuna base sa akong experience ug gipaluyohan sa science, ang biking mas labing maayo nga klase sa ehersisyo itandi sa walking ug running tungod sa iyang low impact sa lawas ug grabe maka-burn og calories.
Maka-burn og maayo og sugar nga naa sa lawas nga numero uno nga enemy sa atong panglawas.
Sa dihang nag-bike ko kada adlaw, ang akong blood sugar di molapas sa 80. Ang labing ubos 67. Niadtong panahuna 105 ang borderline sa prediabetes nga maoy gitakda sa mga health professional.
Pirme kong nakapasar sa among annual physical exam kay bisan ang akong cholesterol ubos man kaayo.
Naabot ko tuod ni apan di sab lalim ang motungas kada adlaw sa bukid, either sa Guba, Mabini, o Busay.
Kon edaran ka na nagsugod sa pag-ehersisyo, ang biking o swimming maanindot nga maoy sinugdanan, labina kon overweight ka kaayo. Kining duha ka fields sa sports pulos low impact busa di ma-stress ang imong kabukogan, labina sa joints.
Sa imong pagsikad sa pedal, circular motion ang mamugna sa imong mga tiil. Ang impact sa imong pagsikad toa sa mga ligid, wa diha sa imong lawas.
Ang nangusog nga muscles mao ang sa lower ngadto sa middle sa imong body. Mao nang mag-tone ang lower ngadto sa middle part sa imong lawas.
PASPAS, MAS LAYO
Sa dagan, ang 42 kilometro nga marathon nagkinahanglan sa best effort, pipila ka oras nga dagan. Dunay ubang runners nga munasginhawa na gani makahuman lang sa mao nga katas-on sa daganon. Apan sa biking, suroy ra gyud na namo kaniadto. Sama ra na og Sunstar ngadto sa Dakbayan sa Naga ug balik. Suroy ra na namo sa gabii sa Biyernes kaniadto. In short, mas paspas, mas layo ang imong maabot sa biseklita. Naka-exercise ka na, nakasuroy ka pa.
Hinuon, mas mahal ang biking kay kon magsugod ka, kinahanglan man nimong mo-invest sa maayo nga biseklita. Ang maayo nga klase sa second hand nga biseklita naa sa mga P30,000 ngadto sa P40,000.
Niingon ko nga maayo nga biseklita kay naa na ni sa upper tier ang mga dapat nga imong makita base sa akong pagsusi sa market sa second hand bikes. Maayo man gud ning lig-on ang sugod, di hit and miss ang pagpabarog og biseklita kay mas gasto.
Mas maayo sab ang second hand kay sagad niana branded na ang mga dapat. Di ka na kinahanglang mangapkap pa kon asa ka makapalit sa parts nga imong gikinahanglan kay sagad maayo na ni og mga dapat.
Gikinahanglan nimo ni aron ang imong kapaspas sa pagsikad ug ang layo nga biyahe smooth ra, di ka matanggong sa kalsada.
SAGOL
Hinuon, duna koy mga higala nga ilang gisagol ang running ug biking. Sagad nila nangapil og triathlon, sports nga nagkinahanglan og grabe nga endurance.
Maayo ra man sab sagulon ang duha ka fields kon kaya sa imong schedule. Running sa hinapos sa semana o vice versa. Sigurado nga maayo ni og epekto sa lawas basta di lang sab palab-anan. Kay ang atong lawas nagkinahanglan og pahuway, busa di maayong palab-anan. Instead makaayo, makadaut na hinuon kini sa lawas.
Kon hamtong ka na, maayo man gani nga mokunsulta og doktor sa di ka pa mosugod sa bisan unsa nga matang sa sports. Kay duna na koy mga nailhan nga nangamatay sa sports, apil na sa biking, kay giatake sa kasingkasing. Kuha og duha ka opinion sa doctors aron mas guided ka sa imong decision.
Ayaw pagpataka og sugod kon di ka sigurado nga andam ka physically kay di lalim ang makuyapan sa daplin sa kalsada. Okay og maulian, apan kon madayunan or kanang momugna og grabeng physical nga kadaut sa lawas. Di na ra ba ko kaihap sa akong gitabang nga bikers nga nakuyapan og kadiyot samtang nagsikad.