Ang ubang mga tawo nagtuo nga luwas ra kaayo ang karsada kon magbiseklita. Nakaingon ko ini human akoang nakita ang usa ka tinun-an nga lalaki nga nag-headset nga nagtindak apan klaro nga wa nakabantay kay wa nakadungog sa andar sa sakyanan nga nagsunod niya bisan duol na kaayo.
Mao na ang sakit sa ubang mga tawo karon nga naa sa karsada kay di na magbantay og maayo. Naay uban ang mga sakyanan ang palihayon.
Naa say mga nagmotorsiklo nga bisan nag-signal na ka, di momenor, inay mobulhot na hinuon sa pagpadagan ang drayber. Huna-hunaa, kon naka-headset ka samtang nagbiseklita unya kusog pa kaayo, makadungog ka kaha sa andar sa motorsiklo nga gimaneho og tawo nga sama og dunay suicidal tendency?
Kon mag headset man gani, igo-igoa nga makadungog ka pa sa andar sa nagsingabot nga sakyanan. Nindot man ang music paminawon kon magsikad kay makuhaan ang kakutas ug kakapoy, apan huna-hunaa usab ang imong kaluwasan kon magsikad nga di ka aware sa imong palibot.
LINGI-LINGI PUD
Usa sa atoang sakit kon magsikad ta kanang di ta kahibawo molingi kon di ba duol ug posibleng maigo sa sakyanan nga nagsunod nato. Liwag ra og kalit nga makapaigking sa nagsunod nga sakyanan, apil na motorsiklo.
Mao ni ang atoang timan-an kanunay kon naa kita sa karsada. Alang ni sa atoang kaluwasan ug di ta makahasol sa ubang mga motorista nga posibleng makaigo nato tungod ra sab sa atoang sayop.
Timan-an nato nga di lang kay kita ra ang naa sa karsada. Wa kita mag-trail.