Nag viral ang video sa panagbangga sa duha ka mga motorsiklo sa may North Reclamation Area, Cebu City, niadtong Biyernes sa buntag. Nangamatay ang duha ka mga driver tungod sa grabeng kadaut sa ilang mga lawas. Grabe ang impact sa panagbangga tungod kay pulos sab kusog ang pagpadagan sa duha ka drivers. Alang nako pulos sad-an ang duha base sa duha ka mga video nga nag-viral.
Ang rider sa big bike kusog nga nakapadagan bisan nakakita na man unta siya nga dunay sakyanan nga miliko sa iyang gisubay nga dalan. Ang maayo unta nipaminor siya aron paghatag og agianan sa mao nga sakyanan aron mapaliko ang driver. Wa sab siya mopahinay aron unta malili kon wa bay laing sakyanan nga moliko.
Ang driver sa gamay nga motorsiklo nasalipdan sa sakyanan nga miliko. Unta wa siya nilahos unya nipakusog og kalit og dagan. Ang maayo unta nga nikuyog siya sa pagliko sa sakyanan kay mas safer kini kay mahimo man to nga protective barrier niya. O di man gani nipahinay siya ug gipaagi ang big bike. Apan nilahos siyag tabok ug nipa-accelarate sa iyang dagan hinungdan nga nabanggaan siya sa big bike.
Ako ning gihisgutan ang mga angay untang gibuhat sa duha ka drivers agi og leksyon sa mga tigmotor, sama nako. Daghan sa two-wheeled vehicle drivers ang kuwang kaayo og defensive driving nga batasan. Angay gyud unta nga mag-amping tang tanan samtang magmaneho kay kining atong lawas di puthaw.
DEFENSIVE DRIVING
Atong hunahunaon nga samtang mag-drive ta, kinahanglan safe aron way tatsa nga mahiuli sa atoang tagsa ka balay. Luwas tang mahiabot. Gikinahanglan nga atoang praktison ang defensive driving. Di hinay but di kusog nga magpadagan.
Di mo-counterflow kay mopadako ni sa chances nga mabangga ka, either ikaw ang makabangga or ikaw ang mabanggaan. Unya if mobayad ang nakaigo nimo, matabla ra gyud ka. Ngano man? Kon masuta sa korte nga ni-counterflow ka, ikaw ang sad-an, di ang nakaigo nimo, di ka mabayran kay nilapas man ka sa traffic flow. Mao gani nga sa among briefing sa accident insurance, among i-emphasize nga di mopalapas sa balaud sa trapiko sama sa pag-counterflow o kaha hubog nga magmaneho.
Kon blind curve or kon dunay nag-park nga mga sakyanan, pagpahinay ug businahi aron makabantay ang driver sa laing sakyanan o pedestrian nga nasalipdan sa mga sakyanan nga nag-park.
Ayaw sab og lahos kon crossing ang dalan kay lagmit naay ubang mga sakyanan nga nagsubay sab sa pikas dalan. Kalagmitan maigo ka. Kadaghan ra ba sa mga aksidente nangahitabo sa nagkuros nga mga dalan. Most of all, atoang sundon ang traffic law ug traffic signages kay gigama ni alang sa road safety.
RESPETO
Kon magtahuray man kita sa usa’g usa sa dalan, hayan maminusan ang mga aksidente. Kon kanunay nato gamiton ang defensive driving, dako ang chance nga malikayan ang mga aksidente sa kadalanan. Apan makapaguol kay daghan ang way pasensya ug common sense.
Kana lang moliko ka sa wala o tuo, inay nga mopahinay ang mga sakyanan nga nagdulong, sagad mga nagmotor, mopabulhot na hinuon. Kadaghan na ko nga nakasuway sa akong pagpaliko, nga gibusinahan ko sa nagdulong nga mga driver sa mga motorsiklo. Inay magpahinay, mopabulhot na hinuon sa ilang sakyanan. Mao nay hinungdan sa ubang mga collision.
Stressful ang pagmaneho karong panahuna tungod sa grabeng kahimtang sa atoang trapiko. Huot kaayo ang kadalanan hinungdan nga ma-late sa trabaho, appointment, ug uban pa. Daghan sa mga gridlock sa mga sakyanan ang hinungdan mao ang way respeto sa usa’g usa. Inay maghatagay og dalan, magpaugatay. Naay ubang drivers kusog kaayo mangayo og lugar pero sila mismo dawo kaayo mohatag og agianan. Mangisog pa.
Kon duna pa lang untay respeto sa usa’g sa dalan, ang kahuot sa mga sakyanan maibanan unta. Apan unsaon man, taas kaayo og garbo, way mohatag og agianan o kalutsan hangtod nga mahitabo ang road rage.