Vallena: Maoy sad-an, mao pay bayran

Karong mga panahuna, kada lakaw nako, milagro na kaayo nga way aksidente sa dalan nga nag-involve og motorsiklo.

Di na tungod sa kadaghan sa mga motorsiklo sa kadalanan, ang hinungdan mao ang kadaghan sa nagdanghag nga magdrayb.

Sama og puthaw og mga lawas, di mopamenor pagpadagan bisan nagkahinay ang dagan sa trapiko, mga eskina ug blind curve. Mo-counterflow pa sa mga blind curve, way pupanagana sa pagpadagan.

Ang nakapait kay ang drayber nga way sala maoy mapriso, pabayron pa.

Grabe kaayo ang dangatan sa drayber nga way sala sa aksidente.

Unya daghan ang nagtuo nga ang way sala nga drayber obligadong mobayad. Mahimo ra gyud nga dili mobayad.

Mahimong ikiha sa korte kay ang hukmanan ra man ang makadesisyon kinsay sad-an.

Di ang traffic enforcer, traffic police, o agent sa Land Transportation Office (LTO) maoy makadesisyon kinsa ang sad-an kay ang ilang gahom kutob ra sa traffic law enforcement.

Mao bitaw kon magmotorsiklo ko maikog ko mo-counterflow kay kon simbako maigo ko sa sakyanan nga akong gikasugat, sila ang mahasol sa akong pagpakabuang ug sala.

Di ilang sala kon naigo ko apan sila ang makabayad ug mapriso.

Mao unta na ang kanunay natong hunahunaon kon mo-counterlow sa kalsada samtang magmotorsiklo.

Naay uban mangasuko pa kon businahan kay nagtuo nga ang iyang gibuhat sakto.

Dako kaayo na nga sayop ang counterflowing hinungdan nga bug-at ni og silot, mahimo kang matangtangan og linsensya.

KUYAW

Niadtong Huwebes, nagbiseklita ko gikan sa among balay padulong sa Talamban.

Nabag-ohan ko samtang nagtindak kay taudtaod na kong wa nakasikad.

Pun-an pa sa di maayo nga shifter kay naglayatlayat ang kadena sa sprocket sa bike.

Apan di ni maoy akong main concern, kon di ang road safety tungod sa kagamay sa dalan sa amoang barangay paingon sa Talamban.

Duna lay portion nga medyo lapad, apan mahibalik ka ra sab sa two-lane nga dalan.

Mas kuyaw na karon ang dalan sa among barangay kay daghan nang dumptrucks ang mangagi, maghatod sa mga basura sa Cebu City ug Mandaue, ingon man suppliers sa sand and gravel ug filling materials.

Di mahimo mopadayon pagtindak samtang nagsunod ang dagkong trak kay di layo ang posibilidad nga maigo ka sama sa ubang mga nagmotorsiklo nga diha sa dalan. Daghan og blind spot ang dagkong mga trak.

Kaniadto kuyawan na gani ko motadlas sa dalan, samot na karon nga daghan na ang mga trak ug motorsiklo nga mangagi. Usa ni sa mga rason kon nganong nangundang mi sa pagbiseklita sa akong mga anak bisan udto na. Kinahanglan nga sayo ka sa buntag motindak aron di maabtan sa kahuot sa trapiko diin apil sa mag-ilog ang mga motorsiklo ug dagko nga mga trak.

Kon sa una sayon ra ang paglusot sa kilid sa dalan, karon lisod na kay naa nay mga motorsiklo nga makig-ilog. Kuyaw kang maigo.

BIKE LANE

Ang N. Bacalso Ave. nga naggikan sa atubangan sa Cebu South Bus Terminal (CSBT) ug Cebu North Road nga nagsugod gihapon sa Cebu City maoy maanindot nga butangan og bike lane. Kini nga major nga kalsada maoy sagad subayan sa mga nag bike-to-work ug niadtong mahiligon sa biseklita.

Weekdays ug weekends daghan ang mangsubay sa mao nga dalan padulong sa north ug south, labina gyud sa mga nag bike-to-work. Kada adlaw ko nakakita. Mao ni sila ang sector nga angay protektahan unta sa kagamhanan gikan sa kakuyaw sa motorized nga mga sakyanan.

Di man hasol sa mga motorista ang paghatag og exclusive bike lane sa mga siklista kay igo-igo man ang gilapdon ani nga major nga mga dalan. Mapanalipdan pa ang kinabuhi sa ordinaryong mga trabahante nga nagbiseklita aron makadaginot. Maayo na kaayo na nga savings alang sa ilang pamilya.

Makadasig sab ni sa mga tawo nga magbiseklita kay duna na may protected nga bike lane nga ilang masubayan. Hinaot pa nga tan-awon kini sa kagamhanan. Mas magamit pa ni kay sa nianang nag-loop nga mga bike lane sa urban centers nga way kapuslanan.