Panagsa na lang ang ulan karon panahuna. Pero puli usab ang grabeng kainit sa panahon. Sa mga batan-on, di kaayo kuyaw ang magbulad sa init basta hydrated lang, apan kuyaw sa mga hamtong nga sama nako.
Duha na ka mga siklista ang akong nailhan nga nangamatay tungod sa tumang kainit. Ang usa akong nakauban sa mountain biking kaniadto samtang ang usa higala sa akong mga kauban sa pagbiseklita.
Mas nindot ron isayo og sikad sama sa akong gibuhat kaniadto ning mga buwana. Alas 5:30 pa lang sa buntag, nagsugod na ko og sikad bisan anang orasa medyo ngitngit pa. Mas sayo, mas dali makabalik sa balay aron di pa kaayo init sa pag-uli. Ang kainit sa adlaw sa alas 9 sa buntag mamaak na.
Ang nakanindot kon sa bukid ka, dunay mga sapa nga nindot kaliguan kon weekends. Kana kon wa ka magdali. Nindot itampisaw sa bugnaw nga tubig. Sama sa akong mga higala nga mangabot sa bukid sa Toledo diin dunay sapa. Adto manawom, magpabugnaw sa panahon ning ting-init.
Mas nindot ikaligo sa sapa, alang nako, kay tinud-anay ang kabugnaw.
MAG-AMPING
Nagpahimangno na ang health authorities kalabot sa grabeng kainit karon dala sa El Niño busa mag-amping ta sa atoang pagsikad, sa karsada man sa patag o kabukiran.
Mas luwas magsikad hangtod sa alas 9 sa buntag ug alas 4 sa hapon hangtod na sa gabii. Matod sa Pagasa, grabe ang kainit gikan sa alas 10 sa buntag hangtod sa alas 3 sa hapon.
Arang-arang lang kon batan-on ka pa, apan kon sama ka nako og edad, o 40 anyos pataas, mag-amping na sa pagbulad sa init. Ang kainiton karon ug kaniadto lahi na sab.
Ang atoang lawas lahi na sab kon hamtong ka na. Bisan gani ang mga batan-on karon susceptible na sa mga sakit sa mga hamtong, hayan tungod sa pagkaon ug lifestyle. Wa pa gani 30 anyos ang uban, duna nay maintenance.
Mag-amping sa pagkaon, labina kon way ehersisyo o pasingot. Ingon pa sa usa ka doktor, igo na nako ang 30-45 minutos nga exercise human sa akong annual exam nga nagpakita nga diabetic na ko.
Di pa man hinuon taas kaayo ang akong blood sugar itandi sa uban nga nagpasingot na, saylo gihapon sa 150 ang blood sugar.
EXERCISE
Karong panahuna nga grabe ang pressure sa trabaho, gikinahanglan kaayo ang pagpasingot. Apan gikinahanglan ba ang taas nga oras sa pag-ehersisyo? Kon ang mga doktor nga akong nahinabi matag check up pasultihon, ang 30-45 minutos kada adlaw igo na kaayo.
Bisan sa ka busy karon panahuna ug kadaghan sa mga tentasyon, mas maayo kon mangita kita og panahon sa pag-exercise. Di sab ta magkwenta sa magasto tungod kay mas mahal ang masakit.
Mas mahal ang pagpa check up sa doktor ug mahal sab ang maintenance, labina kon medyo grabe na ang sakit unya edaran ka na. Sa exercise malingaw ka pa, makakaplag ka pa og mga higala.
Kon same ka nako diha na nag 40 anyos nagsugod og pasingot, wa kinahanglana ang taas nga oras sa pagpasingot. Naa ra sab nimo ang pagpili unsa nga klase sa ehersisyo, mag build ka ba og muscles o pang cardio ang imong tumong.