Mga siyam na ko ka tuig nga nagsige og driver og scooter nga giisip sa kadaghanan nga motorsiklo. Duha na gani ang akong napalit. Ang una ang 115 CC ug ang ikaduha 155CC. Naabot na ko og Bohol ug Negros Oriental sa pagsige og motorsiklo. Tulo na ka endurance rides ang among naapilan sa akong asawa, duha sa 2023 ug usa sa 2022.
Apan, bisan pa niini, way makalupig sa akong excitement sa biseklita bisan tuod kon ang motorized nga sakyanan modala nako sa layo nga lugar kuyog ang akong asawa. Lahi tungod kay makaaninaw ko og maayo sa palibot ug makasulod og mga lugar nga lisod sudlon bisan sa motorsiklo.
Lahi sab kay maka exercise o makapasingot ko. Makasunog ko og calories nga need kaayo ning akong edad karon nga naa na sa middle age. Sa motorsiklo, feel nako panit ra masunog, di ang fats ug sugar sulod sa akong lawas. Lami sab sa biseklita bisan uwan-init pa ang imong masinati.
Kadaghan na ko maabti og uwan sa bukid nya pagkataudtaud miinit sab. Kadaghan na ko nakakaon og hugaw sa pinisik sa mga ligid. Apan wa ni igsapayan kay part ni sa makalingaw nga bahin sa biseklita. Niadtong 2011, nangapil mi sa akong anak og time trial sa mountain bike. Pastilan, di na mi mahitsura sa grabeng lapok nga namilit sa among mga jersey ug shorts.
MAS MAKALINGAW
Mao nang bisan unsaon, mas malingaw ko sa biseklita. Mao sab ni ang nasinati sa uban nakong mga higala nga nakatandi sa MTB ug motor. Mas taas ang ilang panahon nga igahin sa mountain biking kay sa magmotorsiklo o mas daghang weekends ang ilang schedule sa MTB.
Di sab hinuon tanan. Ang nakanindot gud sa biseklita kay hinay, maka observe ka sa palibot. Mapas-an o maguyod ra sa trail kon magkinaunsa. Ang motorsiklo nagkinahanglan og grabeng pwersa.
Busa, kon wa pa lay mga kakulian, mas taas ang akong biking kay sa magmotorsiklo. Dugaydugay na ko nga wa na makasikad tungod sa mga kakulian.
Apan sa kaluoy sa Ginoo, gamay na lang nga pag-antos.