Mga duha ka dekada nga grabe ang problema sa trapiko sa Gov. M. Cuenco Avenue, mas nailhan nga Bantal road. Wa nasulbad ug nagkaluag, apan nagkagrabe samtang nagkadaghan ang mga sakyanan.
Kaniadto sa estudyante pa ko ug sayo sa among kaminyuon sa akong asawa, maglisod na gani, o usahay wa nay masakyan, sa pag-uli kon alas 10 na sa gabii. Karon, bisan alas 12 na tungang gabii naa pay pipila. Mahulog nang 24 oras ang biyahe sa mga publikong sakyanan.
Bisan kaadlawon na, daghan gihapong mga sakyanan ang nagdagan sa amoang dapit. Way katulganay tingali ang ubang mga tawo.
Kining tanang mga sakyanan sa Bantal road mangagi kada adlaw. Kon daghan sa gabii, sa adlawan pil-on sa makadaghan kaayo ang kadaghanon sa mga sakyanan sa amoang dalan, unsa na kaha ang mangagi sa Bantal? Labina gyud kon rush hours kay usahay gikan sa Pit-os hangtod sa Cebu Business Park ang kahuot sa trapiko.
Mao na ang kalbaryo nga gisagubang sa mga taga Banilad hangtod na sa kabukiran sa Cebu City north, ingon man sa mga lumolupyo sa pipila ka mga dapit sa Mandaue City ug Consolacion.
Sa miaging semana gisugdan sa Cebu City Transportation Office (CCTO) ang pagpatuman sa discipline zone sa Bantal. Miarang-arang gamay ang dagan sa mga sakyanan, apan gipasagdan gihapon ang mga motorsiklo nga nag-counterflow.
Ang counterflowing usa na sa makapahinay sa mas luag unta nga lane kay maglikay ka man nga di ikabangga ang ni-counterflow nga driver sa motorsiklo. Kuyaw ka pang makaigo sa right side nga sakyanan sa imong paglikay sa ning-counterflow.
NAAY MOLIKO
Double line ang taas nga stretch sa Bantal busa di gyud unta angay palik-an ang dapit, apan gitugot na lang layo ang mga u-turn slot sa Banilad ug flyover sa may Tesda.
Di lang ni usa sa mga disturbo sa dagan sa trapiko, kon di ang kadaghan sa mga chokepoint sama nianang pasulod ug pagawas sa IT Park. Manghinay ug mohunong ang mga sakyanan. Mosamot pa gyud ni sa plano nga ablihan ang kanhiay nga access road gikan sa IT Park padulong sa Bantal.
Mas dako ni nga problema kay duol ni sa tiilan sa flyover sa Tesda. Huot nang daan diha, mosamot pa na kon buksan ang mao nga access road. Sa tubig pa na, nag-abot ang mga gawsanan, maglunop. Mao sab nay mahitabo sa mga sakyanan.
Moluag tuod ang IT Park ug Salinas Drive, apan gibalhin sa Bantal ang volume sa mga sakyanan. Karon bitaw, miluag gamay ang Salinas, gawas lang sa gabii, tungod kay gibuksan man ang access road sa may Bantal.
Karon, masukod kon epektibo ba ning gibuhat sa CCTO kon buksan na ang klase sa mga tunghaang pribado. Naa diha ang UC Banilad, University of San Carlos, Bright Academy, ug uban pa. Kini nga mga tunghaan pribado ug daghan ang maghatod ug kuha sa mga estudyante.
Mapun-an gyud ang volume sa mga sakyanan.
MANAGE RA GYUD
Samtang magkadaghan ang mga sakyanan, ang pag-manage lang gyud sa trapiko ang mahimo sa traffic authorities, unless dunay revolutionary kaayo nga lakang nga himuon ang mga otoridad.
Hangtod nga dunay maayo ug epektibo nga public transport ug mo-invest ang kagamhanan sa mga imprastraktura, sama sa flyovers isip medium term nga sulbad sa kahuot sa trapiko, wa koy nakitang kahayag sa problema karon.
Bisan gani tawon ang mga negusyante namalit na og mga motorsiklo kay gamit kaayo kon duna silay dinaliang mga lakaw. Ingon niana ang kahimtang karon sa trapiko, di lang sa Bantal, kon di sa kadaghanan sa kadalanan sa Metro Cebu.
Rush hour problem is very common bisan gani sa advanced countries. Apan ang European nga mga nasod nisulbad ini di lang pinaagi sa maayo nga public transport, naa say imprastraktura, apil na ang pag-apil sa ilang plano alang sa mga biseklita.
Radical ni nga paagi kon gamiton dinhi, apan mao ra na ang simple kaayo nga solution – biseklita.