Vallena: Nagpabiling nindot sa biking ang Camotes

Pedal
SunStar Vallena
SunStar Vallena

Sa una nakong taak sa mga Isla sa Camotes, labina sa lungsod sa Poro sa 1999, ang mga karsada maorag sungkaan samtang ang ubang bahin sama og danawan o tunaan sa kabaw.

Ang biyahe nga 30-45 minutos lang unta, depende sa dagan, moabot og kapin sa usa ka oras kay mag-ikis-ikis ang motorsiklo, labina kon gikan ka sa lungsod padulong sa Brgy. Daan Paz.

Apan sa pagpangligid sa mga tuig, sukad namunoan si Gobernador Gwendolyn Garcia, gisugdan ang lapad ug paspas nga pagpangkongkreto sa Camotes.

Iya ning gipalambo isip next tourist destination sunod sa isla sa Bantayan.

Duna pay mga portion nga putol ang mga sementadong karsada. Sa mga mountain biker sama nako, makalingaw ni kon hilig ka og trail.

Kon hilig ka og subida, duna say mga tangason nga karsada padulong sa iyang bukid ug challenging sab ang pagdulhog. Mao ni ang nakalahi sa Camotes tungod sa iyang mga bukid.

Sa pagsige nako og balik dinhi, daghan pa ko og wa ma explore nga lugar.

But sa ako lang nakita, lami kaayo bakasyunan og duha ka adlaw, mosuroy nga magsikad sa tibuok isla. Daghan ang bungtod ug portion sa bukid nga scenic.

Daghan pa sab og kapuy-an nga barato ra, labina sa grupo.

DUNAY KAPILIAN

Kon kaniadto Danao City ra ang barko nga magbiyahian sa mainland sa northern Cebu, karon naa nay ikaduha, sa Liloan.

Sa akoa, dako kaayo ni nga bentaha kay duol ra ni kaayo. Maora ra ni og kusina gikan sa amoa.

Nagkadaghan na sab sila og biyahe sa mga barko kay nagkadaghan ang mga pasahero.

Duha ug tungas sa oras ang biyahe gikan sa Liloan, vice versa, sa Poro. Hamugaway ang biyahe kay duna may igo nga kalingkuran samtang naglawig ang barko. Way magsinardinas.

Di kamahayan ang Camo­tes nga suroyan magbiseklita. Kuwang ra ang usa ka adlaw. Bisan gani duha tungod kay ang dapit nindot kaayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph