Vallena: Nganong mas maayo ang biseklita?

Pedal
PedalVallena

Daghan ang di ganahan og biseklita kay alang nila kuyaw. Mas kuyaw ang motorsiklo kay naay makina ug bug-at. Tan-awa ra gud, maihap lang ang mga aksidente sa biseklita kay sa motorsiklo. Mas deadly pa ang motorsiklo kay mas kusog modagan. Maghilak kon way maaksidente nga labing minos 10.

Sa una nga si Jonathan “Joy” Tumulak pa ang pa­ngulo sa Cebu City Transportation Office (CCTO), ingon niya nga di moubos sa 10 ang mga aksidente.

Unsa na kaha karon nga mas nanaghan ang motorsiklo kay barato ang downpayment ug monthly nga datahan?

Ang bentaha lang sa motorsiklo kay mas paspas gikan sa point A to point B. Mas daghan ka og makarga ug maangkasan.

Mao nay advantage sa motorsiklo kay sa biseklita. Apan kon papilion ko sa duha, mas ganahan ko sa biseklita.

Usa sa nakaanindot sa biseklita mao ang mahatag niini sa imong panglawas. Sington man ka, nga maayo sa kasingkasing ug baga. Biking is a cardio exercise, wa pay labot ang pagporma ani sa imong lawas. Maayo sab sa mental health ning stressful nga panahon.

Sa motorsiklo, modako ang imong tiyan kay maglingkod ka ra man. Mo-exert ka lang og effort kon mo-park o molarga ka.

Kon di man gani, kon mag flat tire ka unya magduot ka sa motorsiklo og mga usa ka kilometro. Tagsa ra sab ni mahitabo.

Less sab ang maintenance sa biseklita. Wa may makina gud. Ang sagad ilisan ra sa biseklita ang brake pads ug kon kada adlaw kang motindak og lagyo, ligid ra ang ilisan. Di man gani, ang interior niya, kana kon di ka mag tubeless.

Kon mag flat tire ka man, mahimo ra mopara ka og habalhabal, imong bitbiton ang biseklita samtang nag-angkas ka.

Sa motorsiklo, di ni mahimo. Advantage hinuon kon tubeless imong mga ligid kay makaabot ka pa sa vulcanizing shop based on experience.

MAS MAHAL

Pipila lang na sa advantage sa biseklita. Apan kon magpatuyang ka sa biseklita, mas mahal ang parts ani kon magpaanod ka sa upgrade. Kon mahalan ka na sa P5,000 nga lingkuranan sa motorsiklo, barato ra na sa biseklita.

Kon mahalan ka sa helmet sa motorsiklo nga tag P6,000, barato ra sab na kon itandi sa high end nga helmets sa biseklita. Sama sa motorsiklo, naa say tag P20,00 kapin nga helmet sa biseklita.

Mahitabo ni kon ganahan ka sab og high end nga mga gamit sa biseklita. Matod pa sa uban nakong mga amigo, bawion na lang sa biseklita, accessories ug mga gamit kay hinay motindak, kusog mohangak.

Kana kon imong paundayunan ang imong hambog sa biseklita, mogasto ka og dako ug mas mahal ni kay sa motorsiklo nga yano ra sab, di high end brands.

Di sab maglagyo ang presyo sa mga ligid sa motorsiklo ug biseklita. Mas mahal pa gani ang ubang mga ligid sa bike kay sa motorsiklo.

MAS SIMPLE

Ang biseklita di komplikado nga klase sa transportasyon kon itandi sa motorsiklo. Yano ra kaayo ni ug sagad gani di na kinahanglan ang mekaniko.

Mahi ra nga ikaw ang mo­bungkag aron limpyuhan ang bike. Makat-unan ni kay naa may daghang tutorials sa Youtube.

Ang motorsiklo lisod gani limpyuhan kay need sagad og mekaniko nga mas suhito sa pagbungkag sa nagkadaiyang parts. Samtang ang biseklita yano ra kaayo og istruktura kon itandi sa motorsiklo.

Wa ka na magkinahanglan og change oil sa biseklita kay wa man ni makina. Naka exercise ka pa, nalingaw ka na. And pwede nimo dad-on bisan asa nga dapit nga gusto mong adtuon.

Naa gani ubang extreme bikers naglibot sa nagkadaiyang mga nasod gamit ang biseklita.

Mas nindot mosuroy nga magbiseklita kay mas maka appreciate ka sa imong giagian kay slower man.

Mas makatan-aw ka sa imong palibot ug giagian nga mga talan-awon. Mas daghan kang mabantayan sa imong giagian.

And sa samang higayon, nakahatag ka pa og kaayuhan sa imong panglawas. Kon ako lang ang ang pabut-on, mas pabor ug ganahan ko sa biseklita kay sa motorsiklo.

Kay man koy pamilya, gikinahanglan ang pagmaneho og sakyanan nga dunay makina. Sa bicycle di ni mahimo.

Ako na giingnan ang akong asawa nga wa kon wa lang siya, mas ganahan ko mag commute o magbiseklita. Maka exercise pa ko ug makadaginot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph