Vallena: Nganong wa kalupad ang biking sa Cebu?

Vallena: Nganong wa kalupad ang biking sa Cebu?
SunStar Vallena

Maguol ko nga magtan-aw nga ang local bike scene wa masustenir human sa Covid-19. Nanaghan ang nag-bike niadtong panahon sa Covid tungod sa kakuwang sa masakyan ug ikaduha, pag-ehersisyo aron pagpalig-on sa lawas batok sa mga sakit, labina sa Covid-19 virus.

Apan dihang nag-anam na og balik sa normal ang tanan, nagkaanam sab og kagamay ang mga nagbiseklita, roadie ug mountain biker. Sa akong obserbasyon, di kaayo maglagyo ang gidaghanon sa bikers itandi sa lima ka tuig nga nakalabay.

Naay nangundang apan naa say ningpuli. Mao nga nakasustenir sab ang bike shops hangtod karon. Gawas pa sa naandang gidaghanon sa mga kustomer, nag online selling sab sila aron mas makaabot sa mas daghang mga kliyente.

Apan mas malambuon pa unta kaayo ang bike industry kon ang kagamhanan duna pay political will sa pagbutang og exclusive bike lane. Sa pagpamalik sa daghang mga sakyanan sa kadalanan, ang nagbiseklita nakigpatentiro sa mga sakyanan nga way respeto sa mga manikad sa karsada.

Tan-awa lang gud intawon ang nahitabo sa bike patrol sa Cebu City namingaw kay lisod kaayo ang pagpatuman sa ordinansa kon half-baked ra ang suporta sa kadagkuan sa siyudad.

HALF-BAKED

Nakaingon ko nga half-baked tungod kay bisan nakita nako ang paninguha sa akong higala nga si Atty. Gerry Carillo ug uban pang mga opisyal sa Sugbo Bike Lanes Board, wa ko nakadungog og pronouncement gikan sa mayor.

Di ko against sa bike patrol ug board, apan dunay mga polisiya nga supak ko sama sa bike registration ug kana pang pagbutang og plaka. Di sab maayo ang pagpatuman sa ubang aspeto sa ordinansa.

Maanindot ang effort ug tumong, apan di sab tanan nga makaayo sa nagbiseklita, labina sa ordinaryong mga trabahante nga mopagawas pa og dugang kwarta aron motuman sa ordinansa.

Mao ni ang pipila sa mga rason karon nganong wa makalupad og taas ang biking dinhi sa Sugbo ug ubang mga dapit sa siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph