Kon naa ka na sa middle age (40 -59 anyos) o bisan gani 30 anyos ka na, magsugod ka na og ka feel og pagbahar sa imong lawas. Bisan gani late teenagers o 20s karon, naa nay mga sakit. Naay mga 20 anyos kapin pa lang giatake na sa kasingkasing. Bisan wa pay 30 anyos diabetic na.
One time nga nag-commute ko sakay sa usa ka PUJ, akong gikatupad ang duha ka call center agents, usa nila nag-edad og 29 anyos base sa akong nadunggan. Ang 29 anyos naghisgot nga duna na siyay gi-maintain nga tambal sa high blood ug diabetes.
Wala ko mahibulong tungod kay ang lifestyle sa mas batan-on nga mga henerasyon lahi sa kaniadto. Ang mga pagkaon kaniadto sagad way preservative. Apan karon, uso na kaayo ang red meat, burger ug uban pang mga pagkaon nga processed. Unsaon sab gud, mas dali ug mas lami ni kan-on kay sa naandang pagkaon nga way preservatives.
Bisan gani karon ang mga karne di ta makaseguro kay ang manok ug baboy nga pangkomersyal o baligya gikan sa farm gipatubo na og dali gamit ang mga kasangkapan nga dunay side effects ang uban sa lawas sa tawo. Mao nang dunay giingon na karon nga organically cared nga mga baboy ug manok kay organic o natural ang ilang mga pagkaon.
EXERCISE
Usa sa mga respetado nga cyclist dinhi sa Cebu usa ka orthopedic surgeon. Matod niya nga sagad sa recovery sa mga pasyente, iyang ilakip ang cycling isip tipik sa program. Sagad sab mga tawo nga naa sa middle age, iyang i-recommend ang biking basta wa pa nakaagi og bisan unsa nga sports regimen ang iyang pasyente.
Nipasabot siya namo nga low to medium impact sa muscles ug joints ang cycling so di siya bug-at alang sa lawas sa mga tawo nga taas na og edad. Di siya morekomendar og running ug uban pang strenuous o bug-at alang sa lawas nga wa pa nakatilaw og grabe nga ehersisyo.
Importante kaayo ang exercise kon magkataas na ang edad kay ang mga epekto sa abuso sa nanglabay nga katuigan makita na man og sugod. Usa niana ang arthritis ug uban pang mga sakit sa mga lutahan.
Wa say kapuslanan ang ehersisyo kon palahubog ka gihapon ug kusog nga manigarilyo. Mas kuyaw gani hinuon tungod kay ang epekto sa stress sa lawas pronounced gihapon kaayo bisan pa kon mag ehersisyo.
Unsa may maayo? Mag ehersisyo ug biyai ang bisyo. Apan sa di ka pa magsugod, konsulta og doktor.