Vallena: Pedestrianization kuwang og konsultasyon?

Pedal
SunStar Vallena
SunStar Vallena

Daghan ang nakurat nga nakakita sa mga poste sa suga nga gipabarog sa Osmeña Boulevard sa habig sa downtown sa Dakbayan sa Sugbo. Hapit na gud ni niabot sa tunga-tunga sa karsada nga nagbutang sa kakuyaw sa mga motorista ug pedestrian, labina sa gabii.

Diay, tipik kini sa plano sa pedestrianization sa downtown padulong sa mga pantalan sa Dakbayan sa Sugbo. Tipik sa mao nga karsada mao ang bike lane nga i-exclusive pinaagi sa pagbutang og plastic bollards. Nindot tan-awon ang plano. Apan gikwestyon kini ni Konsehal Jocelyn Pesquera kay duna na may covered pedestrian sidewalk gikan sa port area ngadto sa Dalan Colon. Gipagamyan na hinuon ang mao nga karsada. Kon huna-hunaon, di baya kinahanglan nga tibhangan og maayo ang karsada. Kay lagi naa may pedestrian sidewalk nga makapasilong pa ang mga tawo nga maglakaw nga di mabalaka nga maulanan ug mainitan.

Kulang lang niana nga sidewalk mao ang kahayag sa kagabhion kay ngitngit gyud na diha. Mao bitaw na kaniadto anha magpangitngit ang mga babaye nga magtanyag og daklit nga kalipay sa mga lalaki nga mangagi. Kuyaw usab sa krimen sama sa tulis ug snatching. Ang pagpadan-ag panahon sa kagabhion mapangitaan og paagi. Mapatrulyahan usab kini sa kapulisan.

KONSULTASYON

Ang blue print unta sa pedestrianization sa downtown area mao ang night market apan palapdan ang coverage, apil na ang heritage sites. Di lang ang tipik sa mao nga mga dapit ang ipailawom niini. Apan gikinahanglan ang panagsultihanay sa stakeholders, labina sa mga negusyante nga maapektuhan.

Mahimo ra baya kaayo ni nga proyekto kon planuhon og maayo una pa ipatuman. Lisod nang dali-dalion kay mapalpak, sama sa bike lanes sa mga Dakbayan sa Sugbo ug Mandaue. Nahuna-hunaan ra ni sa Dept. of Public Works and Highways (DPWH) panahon sa pandemic. Apan paglabay na niini, nasuta nga mapalpak ang pagpatuman niini. Nausik ang milyunes ka pesos nga budget.

Unya karon naa na sab ang pedestrianization nga makapakurat ang pagsugod pa lang. Unsa na kaha kon ipatuman na kini sa kagamhanan nga kalit lang, way konsultasyon sa mga maapektuhan?

Maanindot ang pedestrianization sa downtown nga himuon nga tipik sa tourist attraction, apan di lamulamuon ang pagpatuman. Gikinahanglan ang mga konsultasyon aron makab-ot ang husto nga mga paagi sa pagpatuman. Di sama nianang maora kag nahigmata sa lain na nga balay tungod sa kausaban nga kalit kaayo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph