Vallena: Pila ka oras mag exercise?

SunStar Vallena
SunStar Vallena

Maayo ba nga mobiseklita og dugay aron ka healthy? O igo na ang 30 minutos nga kada adlaw nga pagsikad nga hard? Mga pagtuon nagpakita nga bisan gani sa mga 10 minutos nga ehersisyo matag adlaw makaayo na nimo.

Apan di tingali tanan managsama og resulta. Pananglitan ako nga naanad na sa daghang katuigan sa grabeng bug-at nga mga buhat ug sikad nga labing minos duha ka oras kada adlaw, di tingali moepekto nako na.

Ang girekomendar sa mga doktor mao ang 30-45 minutos nga exercise kada adlaw matag pa check-up nako.

Sa pagkatinuod lang, ang usa ka oras nga sikad kada adlaw kuwang ra kaayo na kon ungo o nalingaw ka og maayo sa pagbiseklita taliwa sa pagkamahagiton nga sitwasyon sa atoang kadalanan. Sa ako nang giingon, daghan na kaayo og mga sakyanan sa kabukiran.

Ang nakaanindot lang sa Talamban kay daghan ka og alternatibo nga mga rota sa kabungtoran sa Cebu City, Mandaue ug Consolacion.

Dihang nagsugod pa ko og sikad, diha ra ko naglibotlibot kauban sa mga silingan sa mga bungtod sa Mandaue ug Consolacion. Nalingaw na ko.

Nagkadugay, nagkalayo ang rota. Hangtod nga nakat-un ko og tungas sa Busay, sa tindahan nilang Willy Ardiente, diin didto mokaon og saging minantikaan ug linung-ag nga itlog o kon di man gani, bihon.

LAYO SA UNA

Sa weekend adto sa Guba, Paril, Mabini, Cambinocot o kon di man gani, molahos sa Sirao ngadto sa Aya­la Heights ug modulhog sa Pung-ol Sibugay dayon motungas sa Brgy. Malobog ug modulhog sa Busay. Adto ra gihapon sa ilang Willy mosangko. Hangtod nagka­layo pa ang gisikaran kay di na matagbaw sa duol.

Apan nagkadugay, ang akong mga higala mangabot na man og kabukiran sa Danao ug Asturias.

Ang labing layo ra nako ang portion sa bukid sa Compos­tela tadlas sa Liloan ug Consolacion.

Makabugto sa ginhawa ang mao nga mga rota. Usahay magmahay ka, makaingon kang mas maayo pa nanglaba ka na lang. Di baya lalim ang kutas.

KADUGAYON

Ang tag usa ka oras nga sikad nga tungas, igo na kaayo na sa naanad og bug-at nga buhat ug grabe nga mosikad, labina kon sama nako, diabe­tic na or pre-diabetic.

Bisan mosikad ka, mas maayo nga magkontrol sa kaon, labina sa mga pagkaon nga dunay carb o taas og su­gar content.

Mao nang di kaayo ko motuo nianang 6-10 mi­nutes nga lakaw kada adlaw dunay dako nga impact sa panglawas.

Kon sama ka nako nga naanad sa heavy exercise o heavy nga buhat, naa man gani nay impact ang pipila ka minutos nga pasingot, gamay ra kaayo.

Kanang usa ka oras nga sikad mas dunay impact sa panglawas.

Apan kon wa ka naanad sa heavy exercise, ang daily nga 6-10 minutes nga paspas nga lakaw, makaayo tingali nimo.

Apan mas maayo nga mag-monitor ka pinaagi sa pagkonsulta sa doktor sa impact niini, labina kon naa ka na sa 40 anyos pataas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph