Sa kadaghan sa mga hitabo nga maka stress nimo kada adlaw, sama sa nagkayamukat nga dagan sa trapiko, gikinahanglan kang moginhawa sab. Alang ni sa mental health. Busa nibiyahe ko aron moginhawa, maglimpyo sa panghuna-huna nga layo sa saba.
Nalipay kong nakakita sa mga nagbiseklita bisan weekdays. Nakagahin sila og panahon sa pagsikad. Akong nabantayan nga ang komon nga lugar nga bisitahon sa mga siklista mao ang lamian nga mga kan-anan ug mga dapit nga maanindot ang mga talan-awon. Melting pot kini sa mga siklista, nag mountain o road bike.
Sa gagmay nga mga negusyo, sama sa bike shop, coffee shop ug karenderya, dako og kontribusyon ang biking sector sa ilang survival. Sa coffee shop, basta lamian ang snack ug kape, adto mag-abot ang mga bike enthusiast.
Kaniadto puro ra karenderya ang naa sa Brgy. Busay, Malubog, Guba ug uban pa. Apan karon duna ka nay kapilian kay sa agianan, naa na ning mga cafe. Naay nadugang nga mga kan-anan nga nahimutang sa mga dapit nga maanindot ang malantaw nga mga talan-awon. Ang uban gani ning mga dapita kakahuyan pa.
NEGATIVE IMPACT
Apan kining tinguha sa pagserbisyo sa mga enthusiast ug publiko pinaagi sa pagbutang og sama nga establisemento duna say negative impact sa environment. Sama sa sitwasyon sa kabukiran sa Dakbayan sa Sugbo. Ang wa mahibaw-i sa kadaghanan, ang kabukiran watershed area busa kini protected.
Mahibulong ka nga duna nay mga adunahan nga nagpabarug sa ilang luho nga mga balay nga maisip na gani nga mansion ang uban niini. Naa nay mga kan-anan nga gipabarug nga di man unta kini pwede. Ang makapaguol, ang nagpasiugda mao ang mga tawo nga gitahasan unta sa pagpanalipod.
Lain pang makapahimangod, gipiyungan lang kini sa kagamhanan nga wa magpakabana kay ang ubang opisyal niini, utro man sab nga maoy nagpasiugda.
Hinaot pa nga sa umaabot nga katuigan, duna pay mahabilin nga kakahuyan sa protected areas. Kay kon ang pag-abuso magpadayon, ang baha ug landslide kanunay nang mahitabo taliwa sa grabeng kausaban sa panahon.
Maayo unta kon ang mga biking enthusiast makahuna-huna sa pagpanalipod pinaagi sa pag-expose sa di maayo nga mga buhat- ang pag-abuso sa atoang watershed areas.