Sa panahon nga ang katawhan napugos na usab sa pagpahugot sa bakos tungod sa nagpadayon nga kalisod sa ekonomiya, mibalik sa sentro sa diskurso ang usa ka karaan apan epektibong solusyon: ang biseklita. Apil na karon ang mga modernong alternatibo sama sa e-bike ug e-trike, mga sakyanang gituohang makatabang sa barato ug mas limpyo nga transportasyon.
Apan samtang nibarog ang panawagan sa pipila ka mga lider sa dakbayan nga tugotan ang e-trike sa dagkong kadalanan sa Sugbo, ang pangutana nagpabilin: andam ba ang atong kadalanan, ug labaw sa tanan, andam ba ang atong sistema?
Apan lahi na ang estorya kon apil na ang e-trike ug e-bike sa dagkong mga dalan nga walay klaro, luwas, ug giprotektahang luna alang kanila. Sa karon, ang kadaghanan sa atong kadalanan dili pa angay alang niini nga matang sa transportasyon.
Hunahunaa kini: ang e-trike ug e-bike, bisan og gamay tan-awon, makapadagan og hangtod 40 kilometros matag oras. Kon isagol kini sa dagkong sakyanan sa highway nga walay klarong segregasyon, dili lamang kini makapahinay sa trapiko, magdala sab kini og dakong risgo sa disgrasya. Dugang pa, daghan sa atong mga drayber kulang pa sa kahibalo ug disiplina sa road safety. Ang resulta? Usa ka delikadong sagol nga mahimong mosangpot sa trahedya.
BIKE LANES UG
KOOPERASYON
Ug unsa may nahitabo sa atong bike lanes? Nasugdan na, oo. Apan napakyas. Ang rason klaro: kakuwang sa implementasyon ug suporta. Ang mga dalan nga gituyo unta para sa mga siklista nahimong parkingan sa sakyanan. Ang mga bollard nga naghatag og proteksyon gipangguba. Walay nanubag. Walay gisilutan.
Kini dili lang simpleng kapakyasan sa proyekto; kini kapakyasan sa pagdumala.
Kon walay lig-on nga kooperasyon gikan sa mga barangay, wala gyuy padulngan ang bisan unsang paningkamot sa pagbuhi sa bike lanes. Ang City Hall dili makahimo niini nga mag-inusara. Ang tinuod nga gahom sa implementasyon anaa sa ubos—sa barangay.
Ang mga opisyal sa barangay ug mga tanod mao ang unang makakita sa mga paglapas. Sila ang nakaila sa mga sakyanang nagbara sa bike lane. Sila sab ang kahibalo kon kinsa ang mga nangguba sa mga protective barrier. Apan kon walay aksiyon gikan kanila, magpabilin lamang kining tanan nga plano sa papel.
Sa di pa nato buhion ang bike lanes, ayuhon una nato ang pundasyon alang sa maayong pagdumala niini. Alang sa kaluwasan sa riders. Disiplina. Implementasyon. Ug labaw sa tanan, kooperasyon. Kay kon magpadayon ang atong kahuyang sa pagpatuman sa balaod, bisan unsa pa kanindot ang plano, mapakyas gihapon kini.