Ang Guangzhou, ikatulo nga labing dako nga siyudad sa China, susama og mga imprastraktura sa Europe. Bisan wa pa ko nakaadto og Europe, makita baya sa internet ang ilang mga imprastraktura. Sa kadako sa siyudad nga bisan gani ang Metro Manila di makatupong, ma- shock ka kon makita nimo sa ilang merkado ang electric nga mga karomata. Way tulodtulod sukwahi sa Carbon public market nga need og human power.
Magdagan pa sa karsada samtang maglingkod ang kargador niini. Ang lain nga makapa-shock mao ang kadaghan sa ilang electric bikes nga makigkompetensya sa mga sakyanan sa ilang kadalanan. Di hinuon sa tibuok siyudad, apan dagko sab nga mga karsada kini managan. Dunay uban nga naa sa ilang sidewalk nga ang kalapad sama og katunga sa OsmeƱa Boulevard.
Apan ang mas makapakugang mao ang mga biseklita nga gitugtan sa kagamhanan nga managan sab sa ilang mga karsada, except sa expressways. Naa pay mag-angkas sa likod nga maglingkod sa biseklita.
Naa say start-up nga kompaniya nga nagpaabang og mga biseklita nga dunay giinstalar nga GPS tracker. Bayran ni gamit ang cellphone nga mobasa sa QR code una pa moabli ang kandado sa likod. Kining tanan nahitabo sa dako kaayo nga siyudad sa China. Ang di nimo makita mao ang mga motorsiklo nga gi-ban sa kagamhanan tungod sa kadaghan sa mga aksidente. Sukad niadtong 2007 wa nay mga motorsiklo nga gadagan sa kinapusoran sa siyudad. Imong makita nga two-wheeled mao ang mga e-bike ug biseklita, way motorsiklo bisan sa ka moderno ug kadako sa siyudad nga ang Cebu wa gani sa kumingking.
WAY KATARUNGAN
Kon gustuhon gyud sa kagamhanan, mahimo kaayo ni sa Cebu ug ubang mga dapit sa Pilipinas. Gikinahanglan ang kausaban nga dako nga rebolusyonaryo kaayo aron masulbad ang nagkagidlay nga trapiko nga nasinati sa urban centers sa nasod, apil na sa Metro Cebu. Kon nahimo sa Guangzhou ang revolutionary kaayo nga pag-usab sa transportasyon, nganong di man sa urban centers sa Pilipinas? Duna silay electric trains, skyways nga lapad ug tag-as, expressways ug hagip-ot sab nga mga dalan nga nahimutang sa karaan nga Canton City nga tipik na sa Guangzhou. Bisan og unsaon og yawyaw sa netizens, ang mahimo ra gyud sa local government units karon mao ang pag-manage sa trapiko, di ang pagpahamugaway sa karsada.
