Vallena: Road safety sa magbiseklita

Pedal
Roger E. Vallena
Roger E. VallenaFile photo

Niadtong nag bike to work pa ko or kon naa ko sa karsada, wa nahitabo nga nagpatunga ko sa karsada bisan kon hinay pa ang dagan sa trapiko. Ngano man? Gawas sa pagrespeto sa mga driver sa motorized nga mga sakyanan, kuyaw sab ang magpatunga tungod kay alang kini sa mga sakyanan nga kusog modagan. Di man kusog modagan ang mountain bike.

Ako ning gihisgutan tungod sa pipila nako ka encounters aning mga magbiseklita nga magpatunga sa karsada, mosuot sa trapiko nga kuyaw kaayo. Sama ra ni og counterflowing ang mao nga buhat.

Kaniadto anha ra ko sa daplin mosubay kay safer ug maagwanta ra sa magbiseklita ang pag-ukiot sa gagmay nga mga agianan sa naglinya nga mga sakyanan.

Lisod baya kaayo sa biseklita ang pagmaneubra kon mountain bike ang imong sakyan. Sa sumpot kaayo nga mga sakyanan, lisod kaayo. Samot na kon naa ka sa tunga sa karsada, sama ka sa nangsugat sa mga sakyanan. Kuyaw kaayo, di ba? Likayi intawon ni nga buhat. Mas luwas ang daplin sa karsada kay sa magpatunga ka.

ROAD SAFETY

Kanunay ko maguol kon dunay mamatay sa nadisgrasya nga nagbiseklita. Kay di baya unta ni angay mahitabo, apan mao lagi, kuyaw na ron ang atoang mga karsada tungod sa kadaghan na sa mga sakyanan, labina sa mga motorsiklo, kansang mga driver grabe makapadagan. Usahay, apil na ko ana.

Sa gabii, sa ako nang giingon sa akong nangagi nga columns, ang visibility sa gabii importante kaayo. Bisan gani kon maglakaw ka sa daplin karsada, lisod kon di ka makita. Mas maayo diay nga hayag ang kolor sa imong isul-ob nga senina.

Kapila na nilupad akong espirito kay dunay padulong molabang but wa nako dayon makit-i kay gabii. Dark color ang gisul-ob nga senina. Bentaha gyud diay kon hayag ang kolor kay makita sa mga driver, labina tong kusog nga makapadagan.

Mao nang importante kaayo sa biseklita nga dunay blinkers, di lang sa seatpost, kon di sa rider mismo, labina sa likod sa helmet. Mas taas ang nahimutangan sa blinker, mas maayo ang visibility. Nakabantay ko nga dunay biseklita nga naa tuoy blinker, apan nasalipdan sa ligid. Unsa may gamit sa blinker if nasalipdan?

Importante ang blinker sa likod sa biseklita alang sa nagsunod nga mga sakyanan.

‘MAKABUTA’

Apan sayop sab nang magbutang og blinker nga puti nga hayag kaayo nga makabuta sa kasugat nga mga sakyanan. Naa na koy nakit-an nga pipila ka cyclist nga naghimo ani o nagtaud og ingon ani.

Di baya ni husto kay makaapekto ni sa panan-aw sa kasugat nga drivers sa mga sakyanan sa pikas lane. Naa koy mga higala nga ingon ana kagrabe ang kahayag sa ilang mga suga.

Didto ko nakaamgo nga diay diay maayo ang hayag kaayo nga suga sa atubangan kay suwaw sa panan-aw sa mga kasugat. Labina kon gamiton nga blinker. Apan naa gyuy mga tawo nga di kahibawo maghuna-huna, sama anang mga nagmotorsiklo nga ang puwa nga tail light, ilisan og puti. Kuyaw na hinuon sa mga nagsunod kay suwaw. Ambot asa ang utok gibutang?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph