Bisan sa kadaghan sa mga sakyanan sa kadalanan, duna gihapoy mga grupo nga magbiseklita. Apan naobserbahan namo sa akong misis nga dunay uban kanila nga way safety gear.
Kining safety gear nagpasabot og mga galamiton alang sa imong kaluwasan, ning aspetuha sa pagbiseklita. Naglakip ni sa helmet, gloves ug blinkers.
Importante kaayo ni panahon sa magsikad, labina sa gabii nga di maayo ang visibility. Ang helmet manalipod sa atoang ulo gikan sa direct impact kon mahagsa ta samtang nagbiseklita.
Proven na ni nga moprotektar sa atoang ulo base sa akong experience, either sa biseklita or motorsiklo. Kaluoy sa Ginuo wa nasamad ang akong ulo pipila ka higayon nga naaksidente ko sa biseklita. Ang mga garas naa ra sa helmet.
Bisan sa akong aksidente sa motorsiklo napanalipdan gihapon ko kay di ang akong nawong ang natrapo sa kalsada, kon di ang helmet nga daghan kaayo og garas.
Ang pagsul-ob og gloves importante kaayo kon magsakay ka og two-wheeled nga transportasyon. Kon matumba ka sa kalsada, at least di ang imong mga kamot ang unang modapat, ang gloves maoy unang matrapo. Mosanta ni sa direct contact sa surface sa dalan mao nga mapugngan ang grabeng injury.
Ang blinkers gikinahanglan kaayo panahon sa kagabhion alang sa visibility. Ang rear ug front blinkers mahinungdanon. Apan ayaw paggamit og puti nga blinker sa front kay makadaut kini sa panan-aw sa kasugat nga sakyanan.
Mas maayo nga ang gamiton puro puwa, at least tagduha ka buok sa seat post sa rear ug handle bar sa front.
MAHINUNGDANON
Ang safety gear mahinungdanon kaayo busa di angay nato isalikway. Cool kaayo og biseklita, apan sa baratuhon nga gear wala manumbaling. Alang ra ni sa atoang proteksyon kay kuyaw kaayo ang kalsada. Kanang mag-drive gani ko, kon di man ko magpalayo og lihay sa gisundan nga biseklita, moaginod ko og padagan hangtod nga makita nako nga safe na ang distansya sa biker.
Daghan ang wa nakaamgo ani nga mga bike enthusiast nga importante diay kaayo ni. Labina gyud sa nag-bike to work nga mga trabahante. Importante ni niadtong mga breadwinner nga kon dunay dautang mahitabo, dako na kaayo og problema.
By the way, nganong importante ang front blinkers? Gikinahanglan ni sa mga dalan nga likuonon kun mga dalan nga dunay blind curve. Ang panan-aw sa drivers limitado kaayo panahon sa gabii. Busa ang blinkers dako kaayo og tabang sa imong visibility aron makita ka sa gikasugat nga sakyanan.
DI MAG-ZIGZAG
Kasagaran sa mga batan-on ug bag-o pang nakat-on og sikad, gara kaayo sa kalsada. Mag-zigzag nga mopadagan, as if way laing mga sakyanan sa dalan. Grabe tawon kaayo kong makalihay kay mahadlok kong masaghiran lang og gamay sa sakyanan, matumba na.
Mas magmatngon ta karon kon magsikad kay daghan na kaayong motorcycle drivers nga dunay suicidal tendency. Makapadagan sama og nagpalupad og rocket, way lingilingi, way pupanagana bisan sa mga eskina.
Kuyaw kaayo tang mapunggitan sa naghaguros nga mga motorsiklo. Mas kuyaw kon wa tay safety gear. Mao nga manegurado, mag-helmet, ma-gloves ug mag-blinker panahon sa kagabhion. Dako na kaayo ni og tabang aron malikayan ang disgrasya ug grabeng injuries.