Medyo epektibo gamay ang traffic scheme sa Gov. M. Cuenco Avenue (Bantal) kay di na kaayo ko matanggong sa trapiko, labina kon padulong sa kinapusoran sa Siyudad sa Sugbo. Bisan gani kagahapon, Sabado, Hulyo 5, wa nakaabot og usa ka oras ang biyahe nako gikan sa Bacayan padulong sa SunStar, duol sa University San Carlos-Main Campus bisan nag-commute lang ko.
Arang-arang na ang biyahe itandi niadtong wa pa sugdi sa Cebu City Transportation Office (CCTO) ang ilang discipline zone sa Bantal. Maayo na kaayo nang usa ka oras ang biyahe nako padulong sa akong naandan nga destinasyon kaniadto.
Karon duna may daghang traffic enforcers nga nagbarog daplin sa dalan. Sama og orchestra, coordinated na ang ilang pag-man sa traffic sa mao nga dalan bisan naa sila sa managlahi nga mga eskina, nga sagad maoy bottleneck kun asa magtipun-og kay nag-abot ang mga sakyanan.
Di na kaayo dugay ang paghunong sa sakyanan aron makatabok sa eskina. Tingali nakuhaan og mga 15 minutos ang kadugayon sa biyahe. Ang sulbarunon pa nila mao ang kahuot sa trapiko sa Archbishop Reyes Avenue padulong sa IT Park, kanang kilid ug ilawom sa flyover sa Tesda.
Wa pa hinuon masuwayi ang mao nga traffic scheme sa volume sa trapiko sa panahon sa pagbukas sa klase sa pribadong mga tunghaan. Kay segurado man nga managhan og maayo ang mga sakyanan sa kadalanan, labina sa rush hours.
BISEKLITA GIHAPON
Samtang nagmaneho ko sa sakyanan pipila ka adlaw ang nakalabay, akong nabantayan ang magtiayon nga nagbiseklita subay sa dalan sa Talamban. Ako kinahanglan pang mohunong aron paagion ang ubang mga sakyanan ug maghuwat kanus-a moirog ang naa sa akong atubangan.
Ang mga nagbiseklita nanubay sa daplin sa kalsada. Wa nihunong, padayon nga miirog sama sa tubig nga nangita og kaagian taliwa sa pagkabara karon ug unya sa mga sakyanan nga upat ang mga ligid. Ako silang naabtaan dapit na sa Nasipit, Talamban.
Kon ang kahuot sa trapiko nihangtod pa sa flyover sa Banilad, maapsan kaha to nako sila? Segurado kong dili tungod kay bisan hinay ang dagan sa biseklita, kanunay man ang pag-irog, way hunong. Di sama sa four-wheeled nga mga sakyanan nga moungot kon dunay usa nga di makairog sa atubangan.
Kaniadto bitaw nga nag-bike to work ko, ang labing dugay nako 35 minutos ang kadugayon sa biyahe gikan sa Bacayan padulong sa Sunstar. Usahay moabot og 40 minutos kon grabe na kaayo ang kahuot sa dagan sa trapiko. Apan kon medyo luag pa gani, ang labing dugay nako mga 25 minutos lang, labina kon sayo kaayo ko sa buntag mosugod og sikad.
Kon ang akong mga lakaw ako lang, o di man gani wa koy appointment, magbiseklita ra gyud ko. Wa pay gasto sa gasolina, simple kaayo nga sakyanan, environment friendly pa.
MINDSET UG KAKUYAW
Ang atong panghunahuna maoy nagdiktar kanato sa atong buhaton sa bisan unsa nga sitwasyon. Sa biyahe, naa sa atong hunahuna nga mas maayo, mas hamugaway, mas luwas ang four-wheeled nga sakyanan. O ang sakyanan nga dunay motor mas dali.
Apan wa ta nakaamgo nga sa mao nga panghunahuna kita ra say naggapos sa atong kaugalingon sa dako nga problema- ang kahuot sa trapiko. Ang tanang tawo nga dunay ikasarang sa pagpalit og sakyanan, mopalit gyud, bisan ang uban way parking area.
Duna gani mga pamilya nga ang mga sakop magtagsa pa og mga sakyanan. Mosamot kahuot ang kalsada kon magdungan na sa pagpanggawas, labina sa rush hours. Bisan gani malakaw ra ang padulngan ug paulian, magsakyanan gyud.
Gawas nga naa ta ani nga panghunahuna, ang atoang mga kalsada kuwang kaayo sa sidewalk. Kon naa man gani, tunga lang sa metro ang kalapdon unya naa pay nagbabag. Kuyaw kaayo ilakaw bisan sa daplin kay basin mapunggitan ka sa sakyanan.
Ako nang nasuwayan sa nakalabay nga mga buwan ang paglakaw gikan sa Bacayan paingon sa Talamban ug pabalik. Kuyaw kaayo ang paglakaw, labina sa mga motorsiklo, kansang drivers reckless mopadagan.
Apan mahimo ra gyud nga maglakaw, ang the best exercise, sama sa biseklita.