Vallena: Sugod og sikad

Kon nagsugod ka pa lang og sikad, ayaw diretso og tungas sa kabukiran. Nindot nang magsugod ka lang sa patag una. Kon gusto ka nga luwas ra ang imong pagtindak, anha sa Ayala Center Cebu Business Park, diin magkanunayan sab ang runners.

Bisan tuod dunay mga sakyanan nga magsaoysaoy sa lugar, luwas kaayo kini sa pagsikad kon itandi sa atoang mga kalsada sa Metro Cebu. Gawas nga minos rang mga sakyanan, gamay ra pud ang mga motorsiklo. Ideal gyud kaayo sa biseklita ang lugar.

Nalipay ko kay safer ang lugar nga mao say among dad-an sa among mga bata nga nagtuon pag biseklita kaniadtong 2010. Wa pay buildings ang dapit ug ngitngit sab. Dunay panahon nga kuyawan kang mag-inusara nga mag-bike o modagan kay mingaw lagi kaayo.

Apan sa pagpanglabay sa katuigan, nahimong paborito nga alternatibo nga dapit ang Ayala Center. Daghan ka og mapiliang lugar asa ka mo-park. Kon duna kay sakyanan, mahimo rang ikarga ang biseklita padulong sa lugar.

Ideal kaayo ang dapit sa mga bata nga gustong magtuon og biseklita. Gani, dunay mga ginikanan nga nagdala sa ilang mga anak aron makasikad og tarong nga luwas. Di man gud ka makadalag biseklita sa sports center sa Abellana. Ang Ayala ra gyud ang dapit nga luwas biseklitahan.

Importante ang pagsugod sa patag aron maanad ang imong mga tuhod. Kon kada adlaw kang nagsikad, sa ikatulo nga semana mahimo nang mangita ka og dapit nga medyo tungason. Pasabot nako mao ang pagsagol na sa imong training, patag ug tungason. But ayaw una pagtungas sa bukid hangtod nga ready ka na.

PAG-ANAD

Yes, gikinahanglan nga mag-anad una ka sa di ka pa motungas. Gikinahanglan ang mixed terrain, patag ug elevated, hangtod nga maanad na ang imong lawas. Dugay ko naandam sa sikad. Naka-adjust ko sa akong sikad sa bukid gamit ang folding bikes nga dagko og plaka. Sagad sa akong folding bike dunay 53 ka mga ngipon.

Wa ko gadahom nga mao to ang nipalig-on sa akong endurance. Yano ra nakong tungason ang bukid nga way hunonghunong, hinay basta tindak kanunay. Kon sa sugod ithan ra ko sa akong mga kauban, nagkadugay makasabay na ko nila. Usahay gani mag-una pa ko.

Apan dugaydugay sab nako ning nahimo kay nibalik ko og sikad 40 anyos na man ko. Katapusan nakong sikad kaniadto 20 anyos pa man ko. Lahi na gyud kon edaran na magsugod. Kon batan-on tingali, di na ingon ato kadugay.

E-BIKE

Nagkadaghan na ang e-MTB rong panahuna. Kaniadto pipila lang ang makita nga naggamit ini sa mountain biking, apan nagkadugay nga daghan na ang maka-afford, nagkadaghan na sab ni labina niadtong mga edaran na sama nako.

Bisan gud lagyo nga mga rota kayang maabot kay ang imong tuhod abagan man sa makina sa e-bike. Di kaayo kutas ug di kaayo bug-at. Ang importante alang nako ang kadaghan sa lugar nga mahimong mataak nga di ka maglisod.

Kon kaya lagi sa kwarta, nindot nga alternative ang e-MTB.