Siyam ka pasahero ug driver ang nanga-angol human madisgrasya ang ilang gisakyan nga van alas 7:45 sa buntag sa Biyernes, Mayo 23, 2025 sa may national highway sa Barangay Banhigan, lungsod sa Dalaguete.
Sa report sa Dalaguete Police Station, kini nagkanayon nga nagsubay sa nasudnong karsada ang Toyota HiAce GL Grandia (GAF 1418) nga gimaneho ni Robert Maglasang Muñez, 38, residente sa Barangay Garing. Lungsod sa Consolacion, dihang nibangga sa poste sa street light.
Human niini, nawad-an og control ang driver sa manobela nga maoy hinungdan nga nalimbuwad sa kilid sa karsada.
Tungod sa kakusog sa dagan, ang siyam ka mga pasahero, ingon man ang drayber, pulos nanga-angol.
Dali nga miabot ang mga rescue personnel sa Municipal Disaster Risk Reduction and Management Office ug gidala sila sa Argao District Hospital.
Matod ni Police Senior Master Sergeant Runard Bureros, ang traffic investigator sa Dalaguete Municipal Police Station, nga gikan sa south ang van kay dunay gikuha nga kabanay ug padung na unta sila nga mamauli sa barangay Garing sa lungsod sa Consolacion apan giingon’g na miscalculate sa driver ang dalan nga maoy hinungdan nga naigo ang poste sa street light.
“Gikan sila sa south nya paingun na sila uli sa Consolacion mao to pag abot anang barangay Banhigan murag wala siya maka calculate sa dalan naigo niya ang poste sa street light nya wala na siya maka control sa steering wheel na darok siya sa kilid sa karsada,” matod ni Bureros.
Anaa ra hinuon sa maayo nga kahimtang ang mga pasahero. / AYB