NAPASAKAHAN na og kaso ang drayber sa tourist van human usa ang namatay, unom na-angol dihang nabangga sa “bridge barrier” alas 6:30 sa buntag Lunes, Hunyo 16, 2025, sa National Highway, Barangay Nueva Caceres, Lungsod sa Oslob.
Kini maoy gipahibalo ni Police Executive Master Sgt. Randy Daga, imbestigador sa Oslob Police Station dihang nahinabi sa Sunstar Superbalita human namatay si Herman Atienza, 75, minyo.
Si Herman namatay alas 4:00 sa hapon, Martes, Hunyo 17, 2025, sulod sa pribadong tambalanan sa Dakbayan sa Sugbo.
Nakagawas na sa tambalanan iyang asawa si Julie Atienza, 55, mga anak Daniel Joseph Atienza, 22, si Gabriel Atienza, 21, ug Julia May Atienza, 18. Apan naa pa sa tambalanan sa ang kamanghurang anak si Raphael Atienza, 10.
Nakagawas na sab sa tambalanan ang pag-umangkon nga si Savannah Earl, 15-anyos.
Matod ni PEMS Daga nga ang drayber sa tourist van nga si Harold Juab Flores, 38, taga Urgello St., Barangay Sambag 2, Cebu City gipasakahan nila og kaso, Huwebes sa buntag sa piskaliya.
Kasong reckless imprudence resulting in homicide and multiple serious physical injury.
Gipasabot ni PEMS Daga nga wala makig-settle ang pamilya sa mga biktima. / GPL