Nangaangol ang pito ka pasahero human ang drayber sa tourist van nagduka alas 6:30 sa buntag sa Lunes, Hunyo 16, 2025, sa National Highway, Barangay Nueva Caceres, Lungsod sa Oslob.
Nangaangol sila si Herman Atienza, 75, minyo (amahan) si Julie Atienza, 55, (inahan), mga anak Daniel Joseph Atienza, 22, si Gabriel Atienza, 21, Julia May Atienza, 18, Raphael Atienza, 10, ug si Savannah Earl, 15, anyos pag-umangkon nga taga Metro Manila.
Ang mga biktima nangalandig sa pribadong tambalanan sa Dakbayan sa Sugbo.
Natanggong si Harold Juab Flores, 38, taga Urgello St, Barangay Sambag 2, Cebu City, drayber sa usa ka tourist van nga nagbase sa Dakbayan sa Lapu-Lapu.
Si Police Executive Master Sgt. Randy Daga, imbestigador sa Oslob Police Station nibutyag sa Sunstar Superbalita Cebu nga ang mga biktima naabot sa lugar alas 3:00 sa kaadlawon sa Lunes.
Nisuroy sila og nag-whale watching sa nahisgutang lugar.
Human sa pagpanuroy, nisakay sila og balik sa tourist van kay mamalik na sa Shangri-La Hotel, Lapu-Lapu City.
Dihang nagsubay ang tourist van sa karsada, wala makabantay ang driver ug nabangga sila sa bridge barrier ug sa koral hinungdan sa pagkagusbat sa tourist van.
Ang mga pasahero gipangdala sa tambalanan samtang ang drayber gikustodiya sa kapulisan. / GPL