NALIMBUWAD ang usa ka pick-up van human gituohang nakatagpilaw ang drayber niini pasado alas 11 sa buntag sa Biyernes, Hunyo 27, 2025, sa may South Road Properties (SRP), dakbayan sa Sugbo.
Ang driver sa maong sakyanan nailhan sa pangan nga Ricky Reli Cañeso, 40 anyos ug lumad nga taga Ormoc City, Leyte.
Sa inisyal nga imbestigasyon sa mga sakop sa Traffic Enforcement Unit kun TEU, nasayran nga nakatagpilaw ang maong driver nga miresulta sa pagka-bangga sa sakyanan sa center island ug sa pagka-limbuwad niini.
Sa pagpakighinabi sa driver, kini miangkon nga nakapiyong siya ug nakugang na lang siya dihang nabangga na.
Naguba ang atubangan ug kilid nga bahin sa sakyanan ug nabungkag usab ang parte sa center island nga gibanggaan niini.
Si Cañeso nakaangkon og mga pangus sa iyang braso, kamot, ug siko.
Samtang ang duha ka babaye nga iyang kauban sa trabaho nga sakay sa luyo nga bahin sa sakyanan, nakaangkon usab og mga bun-og dihang nangapakong ug nangalamba kini sa sulod.
Nasayran nga gikan sila sa ilang opisina sa dakbayan sa Mandaue ug paingon unta kini sa syudad sa Talisay aron mo-deliver sa mga gamit sa ilang kompanya.
Daling giatiman sa medical team ang mga biktima, kinsa nibalibad nga dad-on sa tambalanan.
Sa pagka-karon, gidala na ang sakyanan sa TEU alang sa imbestigasyon. / JDG