Van natumba, 25 angol

AKSIDENTE: Kini ang van nga aksidenteng natumba sa pag-overtake sa laing sakyanan sa national highway sa Sityo Lalaian, Barangay Bulasa, lungsod sa Argao, alas 2 sa hapon sa Huwebes, Nobiyembre 9, 2023. / Gikan sa Argao police
AKSIDENTE: Kini ang van nga aksidenteng natumba sa pag-overtake sa laing sakyanan sa national highway sa Sityo Lalaian, Barangay Bulasa, lungsod sa Argao, alas 2 sa hapon sa Huwebes, Nobiyembre 9, 2023. / Gikan sa Argao police

Nikabat sa 25 ka mga tawo nga sakay sa giabangan nga van nangaangol human natumba sa pag-overtake sa laing sakyanan sa national highway sa Sityo Lalaian, Barangay Bulasa, lungsod sa Argao, alas 2 sa hapon sa Huwebes, Nobiyembre 9 2023.

Ang mga biktima, pulos kabanay ug mga higala, gikan sa Sitio Banawa, Barangay Guadalupe ug Barangay Tisa,dakbayan sa Sugbo, moadto unta sa usa ka beach resort sa lungsod sa Boljoon aron mag-overnight alang sa birthday party sa usa ka bata apan wa na sila nadayon tungod sa insidente.

Ang mga biktima nakaangkon og minor injuries, nangalandig sa Isidro C. Kintanar Memorial Hospital (ICKMH) sa Barangay Bogo, Argao.

Ang mga biktima naglakip sa menor de edad nga usa ka tuig ang pangidaron, 2, 3, 12, 16 ug 17 anyos ug ubang hamtong na.

Sa pakighinabi sa Superba­lita Cebu sa drayber sa van nga si Laurence Goopio, 23, ulitawo, taga Barangay Guadalupe, dakbayan sa Sugbo, alas 11 sa buntag sila nigikan sa dakbayan.

Sakay ang kapin sa 20 ka mga tawo nga kaliwat usa ka pamilya ug mga higala aron mangaligo sa dagat alang sa birthday sa usa ka 2 anyos nga batang babaye karong adlawa, Nobiyembre 10.

Pag-abot nila sa naasoy nga dapit, dason ni Goopio, ni-overtake siya sa lain nga sakyanan apan kalit lang natumba ang iyang gimaniho nga van.

Ang Argao Municipal Disaster Risk Reduction Management Office (MDRRMO) daling nitubag sa alarma gamit ang upat ka mga ambulansiya ug gidala ang mga angol sa district hospital.

Sa pagsuwat ning taho, padayon pa silang gipang-atiman sa mga medical personnel, hinuon way grabe kanila.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph