Usa ka talagsaong pagpangawat ang nahitabo sa Barangay Maribago, Dakbayan sa Lapu-Lapu diin ang suspek nag-underwear lang nga nagpas-an og vault nga giingong adunay sulod nga di mominus P2 milyunes.
Ang tigpamaba sa Lapu-Lapu City Police Office nga si Lt. Col. Christian Torres niangkon sa mga tigbalita sa Martes, Marso 11, 2025, nga ang insidente nahitabo sa Lunes, Marso 10, diin usa ka wala mailhi nga opaw nga lalaki ang nagsilbi nga suspek.
Matod ni Torres nga ang biktima nga Korean national nga nagpuyo sa high-end subdivision sa Maribago, nipa-blotter sa kapulisan sa Police Station 2 niadtong Lunes sa buntag ug nitaho nga gikawat sa suspek ang iyang kuwarta nga gibanabanang mobalor sa P2 milyunes ngadto sa P3 milyunes human kini nisulod sa balay agi sa bintana.
Nakuha ang CCTV footage sa balay sa biktima alas 3 sa kaadlawon nga nagpakita sa lalaki nga nagsul-ob og itom nga underwear ug nagmaskara nga nanaog sa hagdanan samtang nagpas-an og vault nga dobĀle sa gidak-on sa iyang ulo.
Ang biktima niingon nga gawas sa kuwarta, naa sab ang iyang passport.
Iyang giawhag ang publiko nga mo-report sa kapulisan bisan unsang impormasyon nga ilang mahibaw-an mahitungod sa suspek.
Niadtong Dominggo, Marso 9, si Torres niingon nga aduna puy nagpa-blotter sa Police Station 2 tungod sa pagpangawat diin ang susamang hubo nga suspek maoy gipasanginlan nga nangawat og P10,000 sa vault sa laing Korean national sa usa ka subdivision sa Maribago.
Dugang pa niya nga imbestigahon pa sa mga awtoridad kon ang maong suspek mao ba gihapon ang nikawat sa vault nga may P10,000.
Sumala ni Torres, giimbestigahan sa mga pulis ang pagkatawo sa suspek nga daw adunay lahi nga modus nga nagsul-ob lamang og underwear sa labing minos tulo ka mga kaso sa pagpangawat nga nagĀlambigit sa mga Korean national. / DPC / Hulagway gikan sa Lapu-Lapu City Police Office