Nikanaog og timbang si Filipino Jayson Vayson aron suwayan pag-ilog ang korona ni minimumweight unified champion Puerto Rican Oscar Collazo karong Septiyembre 20, 2025, sa Fantasy Springs Resort Casino sa Indio, California, USA.
Si Vayson nagkampanya na unta sa light flyweight division, diin taas siya og ratings sa upat ka mayorihiyang world boxing sanctioning bodies.
Apan dihang niabot kining oportunidad nga makapanuktok siya sa world title, wala siya magmakuli sa paghangop niini.
Katapusang niaway si Vayson sa minimumweight niadto pang 2018 diin nirehistro siya og unanimous decision nga kadaugan batok ni Ronald Alapormina sa Baguio City.
Human niini, nisaka si Vayson sa light flyweight diin kasamtangan siyang ranked No. 3 sa World Boxing Association (WBA), No. 7 sa World Boxing Organization (WBO), No. 8 sa World Boxing Council (WBC), ug No. 11 sa World Boxing Association (WBA).
Batok kang Vayson, depensaan ni Collazo ang iyang WBO, WBA, ug The Ring minimumweight belts.
Si Collazo naggunit og 12-0, 9KOs nga rekord samtang si Vayson naghupot og 14-1-1, 8KOs nga rekord. / ESL