‘Vegetable Highway’ sa Dalaguete, nahulpa

‘Vegetable Highway’ sa Dalaguete, nahulpa
NAHUNLAK: Ang provincial road nga naila nga ‘Vegetable Highway’ nahunlak human sa kusog nga bunok sa uwan, Hulyo 8, 2024. / Hulagway gikan sa Guava Trail Riders Facebook

Tipik sa ‘vegetable highway’ habig sa Brgy. Manlapay, bukirang bahin sa Dalaguete, habagatang Sugbo nahunlak tungod sa pagbunok sa uwan niadtong Lunes, Hulyo 8, 2024.

Ang highway nga usa ka provincial road nga nagtadlas sa Brgy. Mantalongon lahos na ngadto sa Manlapay, Dalaguete naglatas sa bukirang bahin sa Argao ug Sibonga.

Gihulagway ni P/ Executive Master Sergeant Maximo Belciña ang sitwasyon nga ang usa ka bahin sa lane sa nahulpa hinungdan nga dili luwas agian.

Sa Martes sa buntag, Hulyo 9, ang mga opisyal sa lokal nga Kagamhanan sa Dalaguete ingon man kapulisan ug Department of Public Works and Highway (DPWH 7) nihimo og inspection sa kadaut sa maong dalan.

Si Engineer Expedizitas Lena­res sa buhatan sa Dalaguete Municipal Engineer, nagkanayon sa dihang nahinabi sa Superbalita Cebu, nga naghimo sila og evaluation sa nahunlak nga vegetable highway.

Ang resulta ipahibawo ngadto kang Mayor Allan Sesante nga mao sab ang mo-report ngadto sa provincial government.

Si Lenares nipahibawo nga apektado ang mga residente sa Brgy. Manlapay diin sa maong dapit anaa nahimutang ang tunghaan, simbahan ug ubang mga establisemento.

Samtang ang hepe sa Dalaguete Municipal Disaster Risk Reduction Management Office, Almar Villahermosa, niingon nga adunay upat ka mga balay nga apektado sa maong hitabo nga gilangkuban sa 16 ka individuals.

Giawhag ang mga residente nga kasamtangan unang mobakwit tungod sa ka delikado sa sitwasyon ug di matagna kon masundan og laing pagkahunlak.

Dugang pa ni Villahermosa nga hatagan og ayuda ang apektadong mga residente pinaagi sa Municipal Social Welfare Development Office. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph