Ang mga vendor sa Ramos Public Market ibalhin na sa T. Padilla Public Market, kay ang nauna maoy butangan sa Cebu City College.
Sa Miyerkules, Pebrero 7, 2024, labing menos 14 ka stall owners ang nabalhin na sa mga bakanteng stalls sulod sa Ramos Public Market. Ang civil works alang sa City-owned college building nagsugod niadtong Enero.
Si Grace Arinaza, tagdumala sa Ramos Public Market, niingon nga ang civil works sulod sa merkado gisugdan sa pagtukod sa mga column nga nakaapekto sa pipila ka mga vendors.
Gipasalig ni Arinaza nga makapadayon sa pagpamaligya ang mga vendor bisan pa sa nagpadayong construction hangtod nga mabalhin na sila sa T. Padilla Public Market.
Iyang giklaro nga wala pay mga vendor nga nabalhin sa T. Padilla Public Market kay wa pa nahuman ang schedule.
Siya niingon nga ang mga lugar nga gipailawom sa civil works gisiguro nga adunay board-ups aron malikayan ang bisan unsang insidente sa mga konsumidor ug vendors.
Dugang pa, iyang gipasalig nga ang nagpadayong mga trabaho sulod sa merkado dili makahasol sa mga kustomer.
Siya niingon nga ang mga vendor nasayod sa sitwasyon ug nagpahibalo sa ilang mga kustomer mahitungod sa ilang pagbalhin.
Sa laing bahin, si John Paul Amores, ang Office of City Markets (OCM) information officer, nipasalig sa mga vendor sa Ramos nga dunay luna nga magamit nila sa T. Padilla aron sila ma-accommodate.
Bisan pa, ang mga vendor kinahanglan nga makakuha og mga permit, tungod kay kini ang magsilbi nga ilang basehan sa pag-prioritize sa proseso sa pagbalhin, sumala ni Arinaza.
Bisan pa sa nagpadayon nga konstruksyon, naabot gihapon sa OCM ang mga target nga kita sa abang niini.
Sa Ramos Public Market, si Arinaza niingon nga ang iyang buhatan kanunay nga nakakab-ot sa minimum income target nga P340,000 matag buwan.