GISUGYOT ni Cebu City Mayor Nestor Archival ang “vertical housing” isip solusyon sa problema sa socialized housing alang sa mga kabus sa dakbayan.
Kini tungod kay walay igong yuta nga matukoran og mga balay tungod sa paspas nga pag-uswag sa urbanisasyon ug sa populasyon.
Niadtong Sabado, Hulyo 19, nakigtagbo ang mayor sa mga representante gikan sa mga komunidad sa kabus sa siyudad ug sa Division for the Welfare of the Urban Poor (DWUP) ug Presidential Commission for the Urban Poor (PCUP) didto sa Social Hall sa Cebu City Legislative Building aron tukion ang maong isyu.
Atol sa tigom, gipasiugda ni Archival nga ang pagtukod sa mga Medium Rise Buildings o MRBs maoy kaugmaon sa pabahay sa siyudad.
Gikutlo niya ang natukod nga MRB sa Barangay Lorega San Miguel isip usa ka ehemplo.
Matud ni Archival nga ang kolektibong pagduso sa siyudad alang sa vertical development gituyo aron mapahimuslan pag-ayo ang limitado nga mga luna sa dakbayan.
Giawhag ang DWUP sa pagsumite og lista sa mga opisyales ug miyembro sa dili pa ang Agusto 1. / EHP