Andam na ang tanan alang sa pagpahigayon sa bag-ong grassroots basketball tournament sa Kabisay-an nga mao ang Visayas G Hoops nga sugdan karong Hunyo 20, 2025, sa Sacred Heart School gym sa Dakbayan sa Sugbo.
Mao kini ang gipahibalo sa nag-organisar sa torneyo nga si Rocky Alcoseba, anak sa multi-titled coach sa Sugbo nga si anhing Raul “Yayoy” Alcoseba.
“All systems go na ta, ang oras na lang atong gihuwat,” matod ni Alcoseba kabahin sa torneyo nga gisuportahan sa Sunsports, Vistech ug Poxel Graphics and Apparel.
Ang torneyo gilangkuban og 15 and Under boys ug 13 and Under boys nga mga kategoriya.
Sa 15U category, walo ka teams ang magkombati samtang 12 ka teams sa 13U nga gikan sa Cebu City, Tacloban City, Ormoc City, Cagayan de Oro City ug Bohol.
Gipasabot ni Alcoseba nga aduna pa’y teams nga gustong mangapil maong adunay posibilidad nga madugangan pa ang mga partisipante.
“Grabe ang response lagi, naa pay teams nga gustong mangapil. Amo pa na nga sabutan, basin mapun-an,” matod ni Alcoseba kinsa nakigtambayayong nila ni Reynaldo Cañete sa Samahang Basketbol ng Pilipinas (SBP) ug Van Halen Parmis sa pagpasiugda sa torneyo.
Si Cañete maoy tournament director samtang si Parmis maoy consultant sa torneyo.
Gipasabot ni Alcoseba kinsa apil sa coaching staff sa University of the Visayas (UV) Green Lancers nga nakahunahuna sila sa pagpasiugda sa torneyo aron mahatagan og luna ang batan-ong mga basketbolista nga mas mahashasan pa ang ilang abilidad.
“Exposure man gyud ang kinahanglan sa atong young players. We are planning nga himuon ning whole year round. Tingali, naa tay tulo ka conferences in one year,” dugang ni Alcoseba.
Sa sayo pa, aduna unta’y women’s division kining maong torneyo apan matod ni Alcoseba nga nakadesisyon sila nga mopasiugda na lang og laing torneyo nga alang lang gyud sa mga babaye. / ESL