Wala makadawat og report ang Visayas Command (Viscom) lakip na ang kapulisan sa Dakbayan sa Sugbo nga dunay mga personnel niini nga nag-mass resignation subay sa pagdakop kang kanhi Presidente Rodrigo Roa Duterte subay sa warrant niini gikan sa International Criminal Court.
Matod sa information officer sa Viscom Army Lieutenant Colonel Israel Galorio nga ang mga sakop sa Viscom ug ang tibuok pwersa sa Armadong Kusog sa Pilipinas pulos mga professional ug non-partisan organization nga committed sa batakang balaod sa nasud.
Ang mga nanggawas sa social media nga duna nay daghang mga sundalo ang nasagmuyo ug nawad-an na og gana sa ilang trabaho nga maoy hinungdan nga mogawas na lang sa ilang pagka sundalo walay kamatuoran.
"Viscom as a member of the AFP (Armed Forces of the Philippines) remains a professional and non-partisan organization that is committed to our constitutional mandate. We uphold the rule of law and adhere to the chain of command." matod ni Galorio.
Samtang ang kapulisan sa Dakbayan sa Sugbo pinaagi ni Police Lieutenant Colonel Maria Theresa Macatangay nibutyag nga walay polis nga ni-resign gawas lang niadtong mga personnel nga mi-retire tungod kay mandatory sa ilang edad.
Dugang ni Macatangay nga base sa ilang records ug sa monitoring sa ilang mga police stations walay mipakita og kasagmuyo sa mga personnel.
"Wala tay ikabalaka ana as a unit, we remain a strong force and be remain dedicated to our task what is expected of us to do," matod ni Macatangay.
Gilibkas na usab sa kapulisan sa Central Visayas ang ilang alert status gikan sa heightened ngadto sa normal human sa pipila ka adlaw nga dunay gihimong lihok protesta ang mga dumadapig sa kanhi pangulo sa nasod. (AYB)