GIPASAKAAN na og kaso sa Philippine National Police ang usa ka vlogger nga nag-post sa social media og video nga nagpakita sa duha ka lalaki nga daling mikanaog sa usa ka modern jeep.
Sa iyang post, siya miingon nga adunay nahitabong pagpa-nulis sulod sa maong sakyanan.
Ang pagpasakag kaso nahitabo sa Huwebes, Agusto 7, 2025 sa Cebu City Prosecutors Office.
Ang maong video miani og daghang shares sa Facebook ug adunay mikomento nga nibalik na ang krimen nga nakapa-alarma sa katawhan nga nakakita niiini.
Una kini nga nag viral-niadtong Hulyo 7, 2025 human nga daghang media outlet nga mi report sa ilang mga social media page gikan sa usa ka alyas “Jaissle”.
Tungod niini, dali nga mimando ang Police Regional Office 7 sa kapulisan sa dakbayan sa Mandaue tungod kay unang gibutyag sa post nga nahitabo ni sa maong dakbayan.
Apan sa gihimong pakisusi nasuta nga niadto pa kining Mayo 8, 2025 nahitabo didto sa Barangay Yati, Lungsod sa Liloan ug dili sa Mandaue.
Nakig-alayon dayon ang Mandaue City Police Office sa Liloan Municipal Police Station ubos sa huresdiksyon sa Cebu Police Provincial Office ug nasubay nila nga dili tinuod ang maong mikatap nga video nga adunay insidente sa pagpanglabni.
Nahinabi sa mga police ang driver ug konduktor sa modern jeep ug nasuta nga dunay nahi-tabong komusyon tali sa ilang pasahero tungod sa away ug walay nahitabong snatching.
Gumikan niini, gipasakaan og kasong kalapasan sa Cybercrime Prevention Act of 2012 si alyas Jaissle sa Regional Anti-Cybercrime Unit 7 sa pagpangulo ni Police Lieutenant Joshua V. Cruz.
Kung mapamatud-an nga sad-an ang maong sinumbong mamahimong mabilanggo kini sulod sa 6 ka tuig hangtod 12 ka tuig gawas sa multa.
Gipaabot na lang sa PRO 7 ang warrant of arrest batok sa akusado aron ila kining dakpon. / AYB
