Napun-an sa vlogger-turned-boxer Jake Paul ang mga sikat nga boksidor nga iyang napilde, nadugang sa lista si kanhi middleweight world champion nga si Julio César Chávez Jr. niadtong Dominggo, Hunyo 29, 2025 (PH time).
Kahinumdoman nga gipilde pud ni Paul ang legend nga si Mike Tyson Nobiyembre sa miaging tuig. Hinuon sobra sa lapas na sa iyang prime ang 58-anyos nga kanhi heavyweight champ nga si Tyson.
Niining tungora mas batan-on ang gikontra ni Paul og ilado nga Mexican warrior nga si Chavez nga gituhoan nga dakong risgo sa iyaha.
Apan sukwahi sa mga pagtuo, nakahimo si Paul pagkuha sa unanimous decision win. Ang tulo ka judges pulos mipabor kang Paul sa iskor nga 99-91, 98-92 ug 97-93.
Si Paul (12-1, 7 KOs) mipakita sa iyang labok batok sa 39-anyos nga si Chávez Jr. (54-7-2), bisan pa sa kasaba sa mga supporter nga mipadapig kang Chavez sa Southern California.
“I love that he brought a good fight at the end, and I think the fans got a good fight to see him come out, put some punches on me,” sulti ni Paul human sa away. “It makes me better. I had to elevate tonight and rise to a different level. I’m glad the fans got to see me get punched in the face a little bit.”
Si Chavez, kinsa midaog sa WBC middleweight title tuig 2011, wa na makaaway sukad tuig 2021.
Siya nagkanayon nga maayo nga fighter si Paul apan di pa kini andam moaway sa mga kampiyon.
Gihagit man gud dayon ni Paul ang mga dagko nga pangalan sa boksing.
"I want tougher opponents. Zurdo Ramirez. Badou Jack. Gervonta Davis. Anthony Joshua. And Tommy Fury. Quit running,” ni Paul.
Si Paul nagsugod sa iyang career isip vlogger sa wa pa kini mosulod sa kalibutan sa boksing. / RSC