Giawhag ang mga botante ug transferees nga pahimuslan ang gitagana nga sayo nga rehistrasyon alang sa umaabot nga 2025 Barangay ug Sangguniang Kabataan Elections (BSKE).
Giawhag sab ang tanang mga kandidato sa niaging midterm elections nga mo-file sa ilang Statement of Contributions and Expenditures (SOCE) sa dili pa ang deadline.
Gipanawagan kini ni Cebu Provincial Election Supervisor Marchel Sarno, mga duha ka semana sa dili pa ang deadline sa Soce karong Hunyo 11, 2025.
Samtang ang rehistrasyon sa bag-ong mga botante ug pagbalhin og polling precinct ipahigayon gikan sa Hulyo 1 hangtod Hulyo 11, 2025.
Kining 11 ka mga adlaw nga panahon mao ang alang sa bag-ong mga botante, mga transferee, ug kadtong nanginahanglan og record reactivation o correction.
Si Sarno, sa usa ka interbyu niadtong Biyernes, Mayo 30, 2025, niingon nga ang Comelec adunay limitado lang nga panahon ug kapasidad sa pag-accommodate sa bag-ong mga botante, mga transferee ug reactivation alang sa 2025 BSKE.
Iyang giawhag ang publiko nga likayan ang paghulat hangtod sa katapusang adlaw sa rehistrasyon.
Gipasabot ni Sarno nga ang BSKE elections kasagarang makadani og daghang mga botante nga sa kasagaran, mas personal ug emosyonal ang rason kumpara sa nasudnong eleksyon.
Usa ka dakong kausaban sa BSKE mao ang dili pagdawat sa mga barangay certificate isip requirement.
Ang polisiya, gipasabot ni Sarno, nagtumong sa pagpugong sa pagmaniubra ug mga panagbangi gikan sa lokal nga politika human sa nangaging mga taho diin gigamit ang barangay certificates sa ilegal nga pagbalhin sa mga botante ngadto sa laing barangay.
Ang 2025 BSKE mopadayon sa paggamit sa manual voting gawas lang kon adunay balaudnon nga isang-at sa kongreso nga magmando nga automated polls na ang gamiton.
Ang 2025 BSKE elections gikatakda karong Disyembre 1, 2025.
Ang batan-ong mga botante nga nag-edad og 15 hangtod 17 sa o sa dili pa ang adlaw sa eleksyon mahimong magparehistro alang sa Sangguniang Kabataan elections, samtang katong mga nag-edad og 18 mahimong magparehistro isip regular nga mga botante sa barangay.
Ang mga aplikante mahimong mag-pre-fill sa mga porma online pinaagi sa iRehistro platform apan kinahanglan gihapon nga personal nga motungha alang sa biometrics.
Nipasidaan usab si Sarno bahin sa "hakot" o mga taktika sa pagbalhin sa boto ug iyang giklaro nga libre ang pagpangrehistro. / EHP