Vouchers ihatag sa mga nasunogan
Plano sa Kagamhanan sa Lapu-Lapu nga hatagan og voucher ang mga biktima sa sunog sa Sityo Sta. Maria ilabi na ang mga tag-iya og balay aron makapalit og construction materials alang sa pagpatukod og balik sa ilang mga balay imbes nga kuwarta.
Si Lapu-Lapu City Mayor Junard “Ahong” Chan niingon sa Biyernes, Disyembre 22, 2023, nga ang inisyatiba magsiguro nga ang mga biktima mogamit sa ilang kuwarta alang sa mga materyales sa pagpanukod ug dili sa lain.
Gipasabot ni Chan nga ang maong lakang magpugong sa mga biktima nga maglangay-langay sa pagtukod og balik sa ilang mga balay kay basig makompyansa sila, ilabina nga iyang gipasabot nga makadawat sila og daghang cash assistance.
Matod niya nga ang kuwarta alang sa voucher maggikan sa tanang mga donasyon nga nadawat sa Siyudad alang sa mga biktima sa sunog, apil na kon adunay sobra nga kuwarta gikan sa cash assistance nga gihatag sa Siyudad.
Si Chan niingon nga wala pa sila makaprodyus og kinatibuk-ang kantidad sa tanang cash donations, bisan pa iyang gipasalig nga ang cash donations gikuwenta gikan sa mga resibo ug gisumada sa Lapu-Lapu City Treasurer’s Office.
“Buot pasabot gyud tigaan kag coupon para ani nga number sa hardware.. so ikaw ang mag identify para imo palitun kaysa imo sila tigaan og kwarta nya matintal unya nga di ipalit og materiales... especially nga ato gi-announce naa pa ihatag ( cash assistance) magsalig unya na ..gusto gyud nato nga walay problema gusto niya magpalit gyud og materials kay ang problema mabalik sa gobyerno,” matod ni Chan.
Sa talaan sa City Social Welfare Development Office (CSWDO), adunay 1,783 ka mga biktima sa sunog sa Sitio Sta Maria, diin 465 niini mga tag-iya og lote ug balay ug 1,318 ang mga pamilya nga nag-abang.
Si Chan nipasalig nga ang Siyudad mohimo og reblocking sa dapit sa nahitaboan sa sunog sa Barangay Pusok ug tugotan lamang ang mga tag-iya og balay nga mu-okupar, ug nidugang nga mohimo sila og road widening aron malikayan ang susamang insidente.
Kahinumduman, gi-assess sa Bureau of Fire Protection (BFP) Lapu-Lapu ang lugar nga grabe na ang kahuot sa kabalayan, ug ang hagip-ot nga mga karsada niini nakapugong kanila sa pagpawong dayon sa sunog nga niresulta sa halos pagkaugdaw sa tibuok Sitio Sta Maria.
Si Chan niingon nga ang nahabiling mga tag-iya sa balay nga dili ma-accommodate sa reblocking ibalhin sa duol nga usa ka ektarya nga yuta nga gipanag-iya sa General Milling Corp. (GMC), nga gidonar sa kompaniya ngadto sa mga nasunogan.
Sa laing bahin, katungod sa tag-iya sa balay ang paghatag og mga puy-anan sa ilang mga nag-abang, gitugotan nga sila usab magpuyo uban kanila.
PAYOUT
Usab, niadtong Biyernes, ang Siyudad ug ang Department of Social Welfare and Development (DSWD) Region 7 nipahigayon og payouts alang sa cash assistance sa mga nasunogan sa Hoops Dome sa Barangay Gun-ob.
Si DSWD Region 7 Director Shalaine Marie Lucero niingon nga ang ahensya nihatag og P11.6 milyunes nga cash assistance ubos sa Emergency Cash Transfer (ECT) program niini ug P2.9 milyunes alang sa pagkaon ug dili pagkaon ngadto sa mga biktima.
Ang ECT usa ka adaptive nga estratehiya alang sa pagdugtong sa mga kal-ang tali sa hinanaling hinabang sa kalamidad, humanitarian nga tubag, ug sayo nga suporta sa pagbangon pinaagi sa paghatag og kwarta nga walay kondisyon ngadto sa mga biktima sa mga kalamidad ug emerhensya nga nanginahanglan ug interbensyon.
Alang sa Kagamhanan sa Dakbayan sa Lapu-Lapu, ang CSWDO nipahigayon sa Emergency Shelter Assistance (ESA) distribution, nga mokabat sa P11.3 milyunes, ug ang rental subsidy nga gikan sa Quick Response Fund gikan sa Lapu-Lapu City Disaster Risk Reduction and Management Office , nga mokabat sa P6.98 milyunes.
Gianunsyo usab ni Chan niadtong Biyernes nga ang mga nasunogan makadawat og dugang cash assistance gikan sa DSWD pinaagi sa Assistance to Individuals in Crisis Situations (AICS) sa Enero 2024. / HIC