Gihimakak ni Bise Presidente Sara Duterte ang pamasangil sa usa ka giingong hitman sa Davao Death Squad (DDS) nga naglambigit kaniya sa extrajudicial killings sa Davao.
Sa usa ka video message, gipanghimakak ni Duterte ang iyang mga kalambigitan sa DDS (Davao Death Squad), ingon man ang “Oplan Tokhang,” usa ka programa batok sa ilegal nga drugas nga nagtumong sa pagdasig sa mga personalidad sa drugas sa pagsurender sa gobyerno ug magtinarong sa ilang pagpuyo.
“Bago ang script na ito. Sa mga taon na nagsilbi ako bilang vice mayor at mayor ng Davao City, ni minsan ay hindi naugnay ang aking pangalan sa isyung ito. Bigla na lang nagkaroon ng testigo laban sa akin nang mahalal ako na vice president. At kabilang na nga ako ngayon sa mga akusado sa International Criminal Court,” matod niya.
“Maliban sa tiyempo, malinaw na sadyang pinilit lang na maidugtong ang pangalan ko sa isyung ito para ako maging akusado sa ICC. Ang pagpupumilit ng ICC na pakialaman ang ating hudikatora ay panghihimasok sa ating soberanya. Paglapastangan ito sa dignidad ng mga Pilipino at sa karangalan ng Pilipinas,” dugang niya.
Giawhag niya ang mga nag-akusar kaniya nga pasakaan siya og kasong pagpatay sa korte sa Pilipinas.
Kaniadtong Miyerkules, Enero 31, 2024, ang self-confessed nga gunman sa DDS nga si Arturo Lascañas miingon nga si Bise Presidente Duterte ang utok sa Oplan Tokhang.
Matod niya nga gipatuman kini sa panahon ni Duterte isip mayor sa Davao City niadtong 2012 pinaagi sa iyang gitudlo nga hepe sa Davao City Police nga si Ronald dela Rosa, kinsa nahimo’ng nawong sa drug war ubos sa administrasyon ni kanhi Presidente Rodrigo Duterte.
Matod ni Lascañas nga tumong sa Oplan Tokhang ni Bise Presidente Duterte ang pagpatay sa mga drug personality sa dakbayan nga gipalutaw nga kidnapping.
“Mga target nila personalities sa illegal drugs. Lalo pa ang mga gumagamit ng shabu at nagbebenta. Sabi n’ya kidnapin ninyo, ilubog ninyo ang target. Para ang kaso missing person lang,” matod niya.
Si kanhi Presidente Duterte nag-atubang og imbestigasyon atubangan sa International Criminal Court tungod sa kamatayon sa dul-an sa 6,000 ka giingong drug personalities atol sa iyang drug war gikan sa 2016 ngadto sa 2022. / TPM sa SunStar Philippines