SIMPLE ug mosentro sa pagsaulog sa mga Sugboanon ang ipahigayon nga pagpanumpa ni Cebu Governor-elect Pamela Baricuatro sa Hunyo 30, 2025.
Kini maoy tinguha ni Baricuatro subay sa giluwatang pamahayag sa kampo niini sa Hunyo 19, 2025.
Ang oath-taking ceremony sugdan sa usa ka misa sundan sa mga pasundayag sa nagkadaiyang volunteer groups ug dayon ang People’s thanksgiving street party.
Ang maong kalihukan sa Kapitolyo ipahigayon, samtang sabutan pa ang tukmang oras sa maong selebrasyon.
Lakip sa mga dinapit nga bisita ni Baricuatro sila si Vice President Sara Duterte, Senador Imee Marcos, ug uban pang mga national ug regional leaders.
Mangulo sa Inauguration Committee mao si Paulo Uy nga sundan sa thanksgiving party nga gitinguhang magpakita sa hiniusang kusog sa mga opisyal sa Sugbo.
Gidugang ni Baricuatro nga ang simple nga selebrasyon paagi sa pagdaginot sa pundo sa lalawigan ug giingong
dili kini magasto alang lang sa luho.
“Gov Pam has made it clear: this event should reflect the values of humility, unity, and service—not extravagance,” matod ni Ruben Licera kinsa spokesperson ni Baricuatro.
“She instructed the committee to avoid unnecessary expenses and instead channel our energy and resources toward a meaningful, community-driven celebration,” dugang niya.
Gawas sa volunteer performances, gihatagan sab og prayoridad ang mga local artisans ug community musicians.
Giingong libre nila kining gitanyag alang sa probinsiya. / ANV