Nipadayag og kabalaka si Bise Presidente Sara Duterte sa posibleng pagderetso sa impeachment trial gikan sa 19th ngadto sa 20th Congress, gitumbok niya ang kausaban sa komposisyon sa House of Representatives nga maoy iyang gibasehan.
“Kinu-question din namin yan. Yung pag crossover from the 19th to the 20th Congress. Dahil ang composition ng House of Rep,” sa pakighinabi niini sa tigbalita niadtong Hunyo 3, 2025, sa The Hague, Netherlands.
Wala na kini mohatag pa og dugang detalye, ug nagkanayon nga ang iyang mga abogado na ang moasikaso sa maong butang.
Sa sayo pa, gibutyag ni Senador Ronald “Bato” Dela Rosa nga siya ang nagpaluyo sa resolusyon nga nanawagan sa pag-dismiss sa impeachment case batok sa Bise Presidente.
Samtang gipahibalo usab ni Senate President Francis “Chiz” Escudero nga giusab ang petsa sa pagbasa sa impeachment charges batok kang Duterte gikan Hunyo 2 ngadto sa Hunyo 11.
Kahinumdoman nga gi-impeach si Duterte sa House niadtong Pebrero 5, diin dul-an sa 200 ka mga magbabalaod ang nisuporta sa maong lakang.
Kabahin sa bag-ong gitudlo nga hepe sa Philippine National Police (PNP) , Gen. Nicolas Torre III, gisaway ni Duterte ang desisyon, ug niingon nga dili kini makapalambo sa sitwasyon sa nasod.
Gikuha niya isip ehemplo ang pagpili sa Speaker of the House isip usa sa mga kwestiyonableng desisyon.
“In the same way na mayroong recent findings ang Senate of violations of the law of this police officer. So, bakit mo naman gagawing Chief of police? So masyadong sketchy yung decision,” matod ni Duterte.
Kahinumdoman si Torre kanhi direktor sa Police Regional Office–Davao Region (PRO-Davao), maoy nangulo sa pagpatuman sa warrant of arrest batok kang Kingdom of Jesus Christ founder Pastor Apollo Quiboloy niadtong Septiyembre 2024.
Nangulo usab siya sa pagdakop kang kanhi Presidente Rodrigo Duterte niadtong Marso 11, 2025, samtang siya pa ang hepe sa Criminal Investigation and Detection Group (CIDG).