Taliwala sa pagdaghan sa mga dokumentado nga cobra sightings, sagad gitawag nga banakon sa mga lokal sa Sugbo, usa ka eksperto sa panglawas sa publiko nipasalig nga adunay magamit nga pagtambal alang sa mga indibiduwal nga nanginahanglan.
Si Dr. Beethoven Bongon, toxicologist sa Vicente Sotto Memorial Medical Center (VSMMC), nipasalig sa publiko nga duna nay antivenom niadtong nanginahanglan og mga tambal.
Matod niya, polyvalent ang antivenom nga ma-access sa VSMMC Poison Control Center, nga nagpasabot sa pagka-epektibo niini batok sa dili lang usa kon dili tulo ka klase sa cobra, lakip na ang King Cobras, Philippine Cobra, ug Samar Cobra.
Sa sayo pa, gikataho niadtong Disyembre sa miaging tuig nga ang Central Visayas, partikular ang Sugbo, walay Purified Cobra Antivenom (PCAV), nga gigamit isip tambal sa pinaakan sa Philippine Cobra.
Si Ruff Vincent Valdevieso, coordinator sa national immunization program sa Department of Health (DOH) 7, nitug-an sa SunStar Cebu niadtong Nobiyembre nga dili sab kini commercially available.
Ang la o venom sa halas, labina sa cobra, peligro sa kinabuhi o makamatay, kon dili dayon matambalan.
Ang publiko gitambagan nga magmatngon kanunay labina sa kasagbotan ug ubang mabugnaw nga dapit nga paboritong puy-an sa mga halas.