Wa binli’g sud-an misunog sa balay

Balay gisunog sa usa ka hubog nga lalaki nga nasuko nga wala binli og sud-an sa kapuyo sa Martes sa gabii, Enero 9, 2024, sa Sitio Hunop, Barangay Kansi, lungsod sa Tuburan.

Si Julito V. Cabuyao Jr., 24, mamumuo ug nagpuyo sa nahisgutang lugar, nasikop sa kapulisan alas 10:20 sa buntag sa Miyerkules, Enero 10, 2024.

Ang nireklamo sa kapulisan mao si Rosemarie Dacay Tubos, 18, kapuyo sa suspek.

Si Police Lt. Col. Narciso Abapo, hepe sa Tuburan Police Station nga nahinabi sa Superbalita Cebu, nagkana­yon nga hubog ang suspek atol sa insidente gikan nagtagay uban sa barkada.

Matod ni Abapo, ang suspek nasuko kay “walay sud-an” dihang mokaon na unta kini.

Nagkalalis ang duha ug nisaysay ang kapuyo nga iyang gitambagan kini nga dili magsige og inom ug manarbaho aron duna silay mapalit nga makaon ug makapalit og gatas alang sa ilang dos anyos nga anak nga lalaki.

Nasuta nga extra-extra lang ang trabaho sa suspek sa mga cons­truction project.

Tungod sa ilang lalis, nisamot ang kasuko sa suspek.

Ang kapuyo nakuyawan, nipadayag nga mopauli na lang sa balay sa iyang ginikanan ug dalhon ang 2-anyos nga bata aron malikay nga mapagan sa kasuko sa suspek.

Apan ang suspek nga nasuko nang daan kay way sud-an, nihulga nga kon molakaw, iyang sunogon ang ilang balay.

Pero nakahigayon ang kapuyo sa pagpauli sa panimalay sa iyang mga ginikanan.

Nisamot ang kalagot sa suspek, nikuha og lighter ug giduslitan ang panimalay nga ginama sa light materials hinungdan sa pagkaugdaw niini.

“Kana laging normal nga magselos sab ning suspek. Unya inig abot niya sa panimalay dili daw lutoan, andama’g sud-an,” dugang ni Abapo.

Gibana-bana sa mga bombero nga P3,150 ang danyos sa pagkasunog sa balay.

Kasong kalapasan sa Presidential Decree (PD) 1613 o arson ang atubangon nga kaso sa suspek nga gitanggong karon sa selda sa kapulisan sa lungsod sa Tuburan.